Almenn afgreiðsla og lestrarsalur

Almenn afgreiðsla og lestrarsalur Þjóðskjalasafns er á Laugavegi 162, fyrstu hæð. Gengið er inn frá Laugavegi. Á lestrarsal koma þeir sem vilja fá að skoða skjöl sem varðveitt eru á safninu.

Afgreiðsla skjala á lestrarsal

Til þess að skoða skjöl á lestrarsal þarf að senda beiðni um þau með að lágmarki sólarhrings fyrirvara svo hægt sé að afgreiða þau. Beiðnir þurfa að vera skriflegar og samkvæmt skrám safnsins eða leiðbeiningum skjalavarðar. Að öðrum kosti má búast við að ekki verði hægt að afgreiða skjölin. Gögn eru aðgengileg næsta virka dag eða eftir nánara samkomulagi. Ef um er að ræða mikið af gögnum geta orðið tafir á afhendingu. Hentugast er að senda beiðni með tölvupósti á netfangið upplysingar@skjalasafn.is.

Reglur um aðgang að skjölum

Allir geta fengið aðgang að opinberum skjalasöfnum sem varðveitt eru í Þjóðskjalasafni á lestrarsal safnsins. Á þessari meginreglu eru nokkrar, en mikilvægar undantekningar, sem takmarka aðgang almennings að opinberum skjölum og á það sérstaklega við ef skjöl hafa að geyma upplýsingar um viðkvæm mál einstaklinga eða mál sem varða almannahagsmuni.

Um aðgang að skjölum sem varðveitt eru í Þjóðskjalasafni fer eftir ákvæðum laga nr. 77/2014 um opinber skjalasöfn eða eftir atvikum ákvæðum upplýsingalaga nr. 140/2012 ef skjölin eru yngri en 30 ára, en saman mynda lögin heildstæðan ramma um upplýsingarétt almennings.

Aðgangur að skjölum sem innihalda upplýsingar um fjárhags- og einkamál einstaklinga er takmarkaður í 80 ár frá tilurð skjalanna en aðgangur að aðalmanntölum, prestþjónustubókum og sóknarmannatölum er heimill þegar 50 ár eru liðin frá færslu upplýsinganna.

Þá er óheimilt að veita aðgang að sjúkraskrám og öðrum skrám um heilsufarsupplýsingar einstaklinga fyrr en liðin eru 100 ár frá síðustu færslu í skrárnar. Loks getur aðgangur verið takmarkaður í 40 ár ef um er að ræða virka, mikilvæga almannahagsmuni.

Kynningar

Nemendahópar og aðrir hópar geta bókað kynningar og heimsóknir í Þjóðskjalasafn Íslands. Boðið er upp á almenna kynningu á starfseminni þar sem sýnt er úrval skjala sem varðveitt er í safninu. Einnig er hægt að óska eftir nákvæmari kynningu fyrir starfshópa, starfsmannafélög eða nemendur.

Þeir sem óska eftir kynningu á starfsemi eða safnkosti Þjóðskjalasafns eða vilja fræðast nánar um heimsóknir er bent á að hafa samband í síma 590 3300 eða á netfangið upplysingar@skjalasafn.is.