Fyrstu vikur eftir heimkomu barnsins kemur ljósmóðir eða hjúkrunarfræðingur í vitjanir heim í samráði við foreldra til að fylgjast með þroska barns og líðan fjölskyldu.

Hjúkrunarfræðingur hefur samband við fjölskylduna þegar fæðingartilkynning berst heilsugæslustöð en æskilegt er að foreldrar hafi samband strax við heimkomu barnsins og láti vita af sér.

Fastar skoðanir og bólusetningar eru alls ellefu talsins. Fyrsta skoðun er við 6 vikna aldur og lýkur með 4 ára skoðun og þroskamati. Boðið er upp á aukaskoðanir eftir þörfum.

Heilsuvera sendir út áminningu fyrir 2 ½ og 4 ára skoðanir þegar líður að skoðun og biðjum við foreldra að hringja á heilsugæsluna til að bóka tíma fyrir barnið í skoðun. Mikilvægt er að hafa í huga að barnið hafi náð tilskyldum aldri þegar skoðun fer fram.

Skoðanir eru í höndum hjúkrunarfræðinga og lækna stöðvarinnar. Auk þess kemur barnalæknir reglulega og er foreldrum nýbura boðinn tími hjá barnalækni hafi það ekki verið skoðað af barnalækni áður.

Fylgst er reglubundið með vexti og þroska barnsins og fá foreldrar ráðgjöf af ýmsu tagi til dæmis varðandi brjóstagjöf, mataræði, tannhirðu, slysavarnir og fleira