Sónarskoðanir eru framkvæmdar

• í Neskaupstað

• á Egilsstöðum

Athugið að beiðni þarf frá heimilislækni eða ljósmóður.

Fæðingardeild er á Umdæmissjúkrahúsi Austurlands í Neskaupstað. Þar starfa að jafnaði fjórar ljósmæður sem sinna innlögnum vegna vandamála á meðgöngu, fæðingahjálp, sængurlegu og aðstoð við brjóstagjafavandamál s.s. stíflur, sýkingar o.fl.

Ef upp koma vandamál í barneignarferlinu er haft samráð og samstarf við fæðingarlækna á Sjúkrahúsi Akureyrar, áhættumæðravernd Landspítala og barnalækna vökudeildar Landspítala. Öryggi móður og barns er ávallt í fyrirrúmi.

Við bjóðum allar hraustar konur sem eiga að baki eðlilega meðgöngu velkomnar til fæðingar hjá okkur. Við bjóðum upp á fjölbreyttar meðferðir til verkjastillingar í fæðingu, s.s. bað, nálastungur, glaðloft og mænurótardeyfingu. Ef vandamál koma upp í fæðingu er hægt að ljúka fæðingunni með sogklukku eða keisaraskurði.

Við bjóðum fólk velkomið í heimsókn til að skoða fæðingadeildina og kynna sér aðstöðuna þar. Í byrjun árs 2017 var deildin endurnýjuð og bað hefur verið tekið í notkun á nýrri fæðingastofu. Á deildinni eru tvær sængurlegustofur og er lögð áhersla á að fjölskyldan sé á einbýli. Önnur stofan hefur verið endurnýjuð og er hún búin hjónarúmi en hin er með rafmagnsrúm fyrir mæður sem þurfa á því að halda, svo sem eftir keisaraskurð. Í sængurlegunni er lögð áhersla á sólarhringssamveru barnsins við báða foreldra og því er mökum boðið að gista gegn vægu gjaldi ef húsrúm leyfir.

Ljósmæður deildarinnar leggja áherslu á að hlúa að fjölskyldunni í öllu barneignarferlinu sem næst heimabyggð, frá fyrstu vikum meðgöngunnar þar til fæðing er yfirstaðin.

Heimsóknartímar eru fyrst og fremst í samráði við hina nýbökuðu foreldra. Mikilvægt er að fjölskyldan fái næði með nýjum einstaklingi og einnig til að hvíla sig.

Ef fjölskyldan þarf að ferðast um lengri veg og jafnvel bíða fæðingar í Neskaupstað, er reynt eftir megni að aðstoða fólk við að finna íbúð gegn vægu gjaldi.

Flestar ljósmæður gefa meðferð með nálastungum á meðgöngu en einnig í og eftir fæðingu.

Nálastungur eru almennt viðurkenndar sem meðferð við verkjum, ógleði og til þess að auka ytra blóðflæði en þær hjálpa flestum sem þær prófa. Nálastungur örva til að mynda eigið verkjadeyfingarkerfi líkamans og efla almennt heilsu og velliðan.

Helstu ástæður þess að konur í barneignarferlinu leita til ljódmæpra í nálastungu eru:

• ógleði

• grindarverkir eða lífbeinsverkir

• svefnleysi

• bjúgur

• kvíði og óróleiki

• fótaóeirð

• doði í höndum

Margar konur koma einnig í undirbúninganálar fyrir fæðinguna.

Vinsamlegast hafðu samband við ljósmóður á þinni heilsugæslustöð til frekari upplýsinga.

Fyrsta skiptið er frítt en hver tími kostar 1000 krónur eftir það.

Þungunarrof stendur til boða á HSA. Lög um þungunarrof gefur heimild til að rjúfa þungun undir 22 vikum. Mikilvægt er að þungun sé staðfest með þungunarprófi og að ómun sýni þungun í legi.

Ef þú ert að íhuga þungunarrof getur þú fengið símtal við ljósmóður HSA sem aðstoða þig við ferlið. Þú bókar símatíma í síma 4701450.

Tvenns konar meðferð stendur til boða:

Meðferð með lyfjum:

• Ef meðgöngulengd er styttri en 9 vikur: Meðferð getur hafist strax og þungun er staðfest með ómskoðun. Gefið er lyf sem stöðvar áhrif þungunarhormóns.

• Tveim dögum seinna eru fjórar töflur settar upp í leggöngin að morgni, blæðingar geta byrjað um 1 til 3 klst. eftir að töflur hafa verið settar upp.

• Mikilvægt er að hafa einhvern hjá sér í þessu ferli.

• Ef ekki er byrjað að blæða eftir 3 klst. þá á að hafa samband við fæðingadeild FSN.

• Þörf er á að taka þungunarpróf að 4 til 5 vikum liðnum til að meta hvort meðferð hafi tekist.

• Einnig mun ljósmóðir hafa samband á þessum tíma til að athuga hvernig ferlið hefur gengið og hvernig líðan er.

Aðgerð:

• Aðgerð stendur til boða frá 9. til 12. viku, stundum er hægt að framkvæma hana á FSN en stundum er konum vísað á SAk eða LSH í útskaf.

• Þegar búið er að staðfesta þungun með ómskoðun hjá lækni er hægt að bóka tíma í aðgerð.

• Aðgerðin er gerð í stuttri svæfingu. Þegar konan er búin að jafna sig fer hún heim samdægurs.

• Gott er að hafa einhvern með sér í ferlinu þar sem viðkomandi má ekki má keyra eftir svæfingu.

• Eftir 12 vikur er þungunarrof framkallað bæði með lyfjum og aðgerð en þá geta ljósmæður deildarinnar aðstoðað þig við að bóka á SAk eða LSH.