Stoðkerfi

Starfsfólk getur fundið fyrir ýmsum álagseinkennum frá stoðkerfi líkamans vegna vinnu sinnar en stoðkerfisvandi er ein algengasta orsök fjarvista frá vinnu og ein af ástæðum örorku. Atvinnurekendur og starfsfólk geta í sameiningu reynt að koma í veg fyrir að vinnuaðstæður leiði til álagseinkenna og er mikilvægt að horfa til umhverfisþátta, búnaðar og líkamsbeitingar í því sambandi.

Þættir sem draga úr líkum á álagseinkennum frá stoðkerfi:

• Góð vinnuaðstaða og búnaður sem hæfir starfsmanni og starfi

• Fjölbreytt verkefni

• Góð líkamsbeiting við vinnu

• Notkun á viðeigandi léttitækjum

• Regluleg hlé og hæfilegt vinnuálag

• Regluleg hreyfing, auk nægrar hvíldar og svefns

• Sálfélagslegt vinnuumhverfi þar sem lögð er áhersla á heilbrigða vinnustaðamenningu

Regluleg fræðsla til starfsfólks um ofangreinda þætti skilar einnig miklu.

Huga þarf sérstaklega vel að nýju starfsfólki og starfsfólki sem ekki hefur íslensku sem móðurmál.

Þættir sem geta stuðlað að starfstengdum stoðkerfisverkjum og eru gjarnan samverkandi:

• Störf sem fela í sér að lyfta og bera þunga hluti, vinna undir miklu álagi eða hraða og að vinna í óþægilegum líkamsstöðum yfir lengri tíma.

• Endurteknar athafnir og einhæft álag

  Ýmsir umhverfisþættir svo sem hávaði, kuldi, titringur og léleg lýsing

• Einstaklingsbundnir þættir eins og svefn, streita, kyn og aldur.