Stöðu- og framvindupróf í stærðfræði og lesskilningi: Handbók
Þjónustuaðili:
©2026 Miðstöð menntunar og skólaþjónustu
Öll réttindi áskilin
1. útgáfa 2026
Framsetning á niðurstöðum stöðu- og framvinduprófa
Megintilgangur þess að leggja próf fyrir nemendur er að fá upplýsingar um árangur af kennslu, hver staða nemenda er og hver næstu skref þurfa að vera til þess efla og styrkja nám. Eitt meginmarkmið með framsetningu á niðurstöðum stöðu- og framvinduprófanna er að uppfylla þennan tilgang með því að veita upplýsingar um stöðuna svo hægt sé að skipuleggja kennslu stakra nemenda, bekkjar eða á skólavísu með árangursríkum hætti. Hringrás mats og kennslu lýsir ferlinu skýrt þar sem markviss öflun og notkun gagna um árangur nemenda í námi leggur grunninn.
Niðurstöður stöðu- og framvinduprófanna eru teknar saman í texta, í töflum og á myndrænu formi, bæði fyrir prófin í heild og hvern inntaksflokk. Þær eru settar fram á mælitölu, raðeinkunn og sem hlutfall réttra svara.
Raðeinkunn er mælikvarði á frammistöðu nemenda í samanburði við aðra nemendur í sama árgangi á landsvísu. Hún endurspeglar því hvar nemandinn stendur í röðinni. Ef nemandi fær raðeinkunnina 47 þýðir það að hann stendur sig jafn vel eða betur en 47% nemenda á landsvísu.