Miðstöð menntunar og skólaþjónustu
Stöðu- og framvindupróf Matsferils
Tilgangur stöðu- og framvinduprófa í lesskilningi og stærðfræði er að draga upp sem nákvæmasta mynd af stöðu nemanda og framvindu í námi, hvar áskoranir og styrkleikar liggja svo hægt sé að mæta námslegum þörfum nemenda á árangursríkan hátt.
Stöðu- og framvinduprófin eru stöðluð en það þýðir að form, efnisinnihald, matsreglur og reglur um fyrirlögn prófanna eru fyrir fram ákveðin. Þar sem hverju prófi fylgja aldursbundin viðmið um frammistöðu er mögulegt að bera niðurstöður hvers nemanda, bekkjar eða skóla saman við landsmeðaltal.
Fyrirlagnartímabil prófanna er marsmánuður. Þessi sveigjanleiki gerir skólum kleift að aðlaga notkun prófanna að eigin kennsluskipulagi. Fyrirlögn stöðu- og framvinduprófa í lesskilningi og stærðfræði er skylda í 4., 6. og 9. bekk en ákvörðun um notkun prófanna í öðrum árgöngum er í höndum kennara, skólastjóra eða fræðsluyfirvalda hvers sveitarfélags. Með því að leggja prófin árlega fyrir fást góðar upplýsingar um framvindu nemenda.
Mikilvægt er að nota niðurstöður prófa til skipulagningar kennslu í samræmi við stöðu nemenda, við mat á árangri kennslunnar við lok lotu, annar eða skólaárs. Upplýsingarnar úr prófunum eru mikilvægar fyrir stefnumótun skóla, til forgangsröðunar og þegar ákvarða þarf áherslur í starfsþróun kennara svo dæmi séu tekin. Niðurstöður verða einnig notaðar til að fylgjast með gæðum skólastarfs og þróun og breytingum innan menntakerfisins.
Stöðu- og framvindupróf í stærðfræði og lesskilningi: Handbók
Í handbókinni er að finna mikilvægar upplýsingar um stöðu- og framvindupróf í stærðfræði og lesskilningi. Þar er meðal annars fjallað um uppbyggingu prófanna, nauðsynlegan undirbúning, fyrirlögnina sjálfa og gildi markvissrar notkunar á niðurstöðum fyrir námsárangur nemenda. Lestur handbókarinnar eykur líkur á farsælli fyrirlögn þar sem hann eyðir óvissu um framkvæmdina og tryggir sameiginlega sýn skóla á tilgang prófanna.
Leiðbeiningar fyrir tæknitengiliði skóla vegna stöðu- og framvinduprófa Matsferils
Tæknitengiliðir skóla gegna lykilhlutverki í undirbúningi og framkvæmd stöðu- og framvinduprófanna. Hér má finna upplýsingar um atriði sem þarf að undirbúa í aðdraganda prófanna og verkefni tæknitengiliða á meðan á prófum stendur. Þessum leiðbeiningum er ætlað að auka líkur á snurðulausri framkvæmd en hluti leiðbeininganna geta átt erindi við kerfisstjóra sveitarfélaga.
Myndbönd
Stutt og hnitmiðuð myndbönd eru góð leið til að kynna sér og rifja upp mikilvæg atriði sem lúta að undirbúningi og framkvæmd stöðu- og framvinduprófa Matsferils. Ítarlegri upplýsingar má finna í handbók prófanna og eru skólar hvattir til að lesa hana vakni spurningar við áhorf myndbandanna.
Sýnispróf
Stöðu- og framvindupróf Matferils í stærðfræði og lesskilningi eru lögð fyrir í stafrænu prófakerfi. Þar sem kerfið er nemendum framandi í fyrstu hafa sýnispróf verið útbúin en tilgangur þeirra er að kynna og þjálfa nemendur í próftöku í slíku kerfi. Sýnisprófunum er ekki ætlað að þjálfa nemendur í efnistökum prófanna. Prófin verða opin og aðgengileg öllum en hægt verður að fara í gegnum þau eins oft og hver vill eða þarf.
Kennarar eru hvattir til að fara í gegnum sýnisprófin, fyrst sjálfir og svo með nemendum sínum þar sem öryggi við próftöku í stafrænu umhverfi getur minnkað álag og hjálpað nemendum að einbeita sér að prófverkefnunum. Sýnisprófin er að finna á synisprof.mms.is.
Sýnispróf