Niðurstöður stöðu- og framvinduprófa eru birtar á skýran og aðgengilegan hátt.

Nemendur fá niðurstöðu sem hlutfall réttra svara á prófinu. Það sýnir hversu mörgum spurningum nemandinn svaraði rétt og gefur skýra mynd af frammistöðu hans á viðkomandi prófi.

Auk þess er staða barns innan hóps jafnaldra á landinu skoðuð. Henni er lýst á mynd og í texta þar sem fjallað er um

• hvað einkennir hæfni nemanda

• hvaða þarfir hann hefur í námi sínu í viðkomandi námsgrein

Markmiðið er að tryggja rétt úrræði fyrir rétt börn.

• Börn neðst í dreifingu hóps jafnaldra þurfa skýr inngrip og markvissa eftirfylgd.

• Börn efst í dreifingu þurfa meiri áskoranir.

Mynd sem sýnir framvindu gefur yfirlit yfir þróun árangurs milli ára og gefur vísbendingu um hvort nemandi sé að taka framförum, standa í stað eða þurfi frekari stuðning.

Notkun mælitalna gerir okkur kleift að setja niðurstöður ólíkra prófa á sama kvarða svo hægt sé að bera þær saman. Þannig veita þær góðar og samanburðarhæfar upplýsingar um stöðu nemanda í námi. 
 
Mælitölur eru á kvarðanum 1-19 þar sem mælitalan 10 er alltaf landsmeðaltal. Mælitala lýsir því hvar nemandi er staddur í samanburði við jafnaldra. Nemendur með hærri mælitölu eru þá yfir landsmeðaltali og nemendur með lægri mælitölu eru fyrir neðan landsmeðaltal. Tölurnar lýsa því hversu langt frá landsmeðaltali nemandi er. 
 
Hverri mælitölu fylgir lýsing á stöðu nemandans og almennar upplýsingar um næstu áherslur í námi og nýtast þannig við túlkun á niðurstöðum og ákvörðun um næstu skref í námi barns.  
 
Nemendur með mælitöluna 7 og undir þurfa sérstök inngrip og mælst er til þess að kennarar fylgi þeim eftir með nauðsynlegum aðgerðum.

Niðurstöður stöðu- og framvinduprófa í lesskilningi og stærðfræði sem þreytt verða í mars 2026 verða birtar á Ísland.is í maí sama ár.

Niðurstöður lesfimiprófa sem þreytt verða í maí 2026 verða birtar á Ísland.is fyrir skólalok.

Forsjáraðilar geta nálgast niðurstöður barna sinni inni á Ísland.is með því að skrá sig inn á Mínar síður.

Forsjáraðilar munu geta nálgast niðurstöður barna sinni inni á Ísland.is með því að skrá sig inn á Mínar síður. Kennarar munu einnig miðla niðurstöðum til nemenda og aðstandenda þeirra.

Niðurstöður prófanna eru notaðar til að tryggja að nemendur fái viðeigandi stuðning og áskoranir í námi.

Hlutfall réttra svara gefur mynd af frammistöðu nemanda á viðkomandi prófi. Til að meta stöðuna nánar eru niðurstöðurnar einnig settar í samhengi við árangur jafnaldra á landsvísu. Sá samanburður gefur vísbendingu um hvar nemandi stendur innan hópsins. Upplýsingarnar eru nýttar til að:

• greina hvaða nemendur þurfa markvissan stuðning og skýr inngrip

• tryggja eftirfylgd þar sem þörf er á

• veita nemendum sem standa framar auknar og krefjandi áskoranir

Markmiðið er að tryggja að rétt úrræði séu veitt réttum nemendum og að kennsla taki mið af stöðu og framvindu hvers og eins.

Tilgangur Matsferils er að stuðla að bættum námsárangri nemenda á Íslandi með reglubundnu og markvissu mati.

Matsferill veitir nemendum, foreldrum og kennurum skýrar upplýsingar um stöðu og framfarir nemanda. Þessar upplýsingar nýtast í kennslu til að stuðla að framförum, t.a.m. með auknum stuðningi eða stærri áskorunum, allt eftir stöðu nemanda. 
 
Skólar, sveitarfélög og menntayfirvöld fá einnig skýra mynd af stöðunni í stærra samhengi. Þetta gerir skólastjórnendum og stefnumótandi aðilum kleift að greina áskoranir og leggja til umbætur. Þannig stuðlum við að framförum í menntakerfinu.

Prófin í lesskilningi og stærðfræði eru lögð fyrir í mars. Prófatímabilið er einn mánuður og ræður skólinn hvenær hann leggur prófið fyrir nemendur sína á því tímabili. Próftíminn er 80 mínútur en flestir nemendur ljúka prófinu á 40-60 mínútum. Ekki þarf að undirbúa sig sérstaklega fyrir prófið. 
 
Prófin eru lögð fyrir í tölvu en í stærðfræði fá nemendur rissblað til að vinna á útreikninga og annað sem þeir þurfa til að finna rétt svör. 
 
Hér má sjá sýnispróf í lesskilningi og stærðfræði. 

 
Myndband um lesskilningspróf

Myndband um stærðfræðipróf

Prófin í lesfimi er lögð fyrir þrisvar á ári - í september, janúar og maí. Hvert fyrirlagnartímabil er einn mánuður og ræður skólinn hvenær hann leggur prófið fyrir nemendur sína innan tímabilsins. Í prófinu lesa nemendur upphátt texta af blaði í tvær mínútur og metur prófið hversu nákvæmur og hraður lesturinn er.

Gert er ráð fyrir að allir nemendur sem fylgja árgangi í námi taki prófin. Skólastjóri getur sótt um undanþágu fyrir nemendur, sem einhverra hluta vegna, hafa ekki ávinning af því að taka prófin en það er alltaf gert í samráði við forsjáraðila.

Já, m.a. er hægt að fá upplestur á stærðfræðiprófi, næði við próftöku eða próftöku í minni hópum. Ekki er boðið upp á upplestur í lesskilningsprófi vegna þess að tilgangur prófsins er að meta að hvaða marki nemendur geta nýtt lestrarfærni sína til að afla sér upplýsinga úr texta. 
 
Ekki þarf að sækja sérstaklega um stuðningsúrræðin en það er mikilvægt að nemendur óski eingöngu eftir þeim úrræðum sem þeir eru vanir að nota og þurfa á að halda í prófi.

Prófin krefjast ekki sérstaks undirbúnings en alltaf er mikilvægt að hvetja börn til að gera eins vel og þau geta. Þannig fást bestu upplýsingarnar um færni þeirra.