Meðlagsgreiðendur

Greiðsludreifing

Ef þú getur ekki staðið skil á meðlagsgreiðslum getur þú sótt um greiðsludreifingu til að koma í veg fyrir vanskilainnheimtu með því að senda skriflega beiðni á medlag@syslumenn.is eða með bréfi til Sýslumannsins á Norðurlandi vestra.

Skilyrði greiðsludreifingar

• Lágmarksfjárhæð mánaðarlegra greiðslna: 10.000 krónur.

• Hámarkstími: 36 mánuðir.

• Hafir þú ekki tök á að greiða kröfuna upp á 12 mánuðum er hægt að fylla út umsókn um lengri greiðsludreifingu.

Athugið að dráttarvextir reiknast á vangreidd meðlög mánuði eftir eindaga þrátt fyrir greiðslusamkomulag. Skuldajöfnuður við vaxtabætur fer einnig fram óháð greiðslusamningi.

Atvinnuleysi

Ef meðlagsgreiðandi missir vinnu getur hann óskað eftir greiðslufresti til allt að 6 mánaða. Endurskoða þarf samkomulagið ef greiðandi fær vinnu á ný eða fresturinn rennur út. Hafi greiðslufrestur staðið í 12 mánuði þarf greiðandi að inna af hendi lágmarksgreiðslu.

Þegar greiðandi fær atvinnuleysisbætur er aukagreiðslum vegna barna ráðstafað upp í meðlag. Mikilvægt er að tilkynna strax þegar greiðandi fær atvinnu að nýju, þar sem kröfur eru sendar í laun þrátt fyrir frest.

Námsmenn

Stundi meðlagsgreiðandi nám og á rétt á námsláni frá Menntasjóði námsmanna, getur hann sótt um styrk sem nemur áfallandi meðlagi. Menntasjóður gerir ekki kröfu um endurgreiðslu hans náist tilskilinn námsárangur. Menntasjóður námsmanna veitir nánari upplýsingar um slíkan styrk.

Á meðan á námi stendur er hægt að sækja um lægri greiðslur eða greiðslufrest á uppsafnaðri skuld, að því gefnu að sótt sé um styrkinn. Beiðni um greiðsludreifingu eða greiðslufrest skal senda á medlag@syslumenn.is ásamt staðfestingar á skólavist.

Örorku-, endurhæfingar- eða ellilífeyrisþegar

Meðlagsgreiðandi sem er skráður 25–75% öryrki getur sótt um barnalífeyri hjá Tryggingastofnun, sem jafngildir meðlagsfjárhæð. Hlutfall greiðslna fer eftir örorkuprósentu:

• 75% öryrki fær fullan barnalífeyri

• 50% öryrki fær 75%

• 25% öryrki fær 50%

Barnalífeyri er skuldajafnað á móti meðlagi. Sama rétt eiga þeir sem fá endurhæfingar- eða ellilífeyri.

Sækja þarf um barnalífeyri hjá Tryggingastofnun. Fái greiðandi barnalífeyri getur hann óskað eftir lægri mánaðarlegri greiðslu.

Fjárhagsaðstoð frá sveitarfélagi

Ef greiðandi fær fjárhagsaðstoð frá félagsþjónustu sveitarfélags á hann oft rétt á viðbótargreiðslum vegna meðlags. Sveitarfélagið greiðir þá fjárhæð beint til sýslumanns. Greiðandi þarf að hafa samband við sitt sveitarfélag.