Myndin að neðan sýnir fyrstu niðurstöður sem kennarar sjá um hvern nemanda. Þar er almennri stöðu og næstu skrefum í kennslu lýst, auk þess sem niðurstöður eru settar fram á mælitölu, raðeinkunn og sem hlutfall réttra svara á prófinu (sjá útskýringu á þessum hugtökum hér) . Einnig eru upplýsingar um hversu langan tíma það tók nemandann að þreyta prófið.

Á myndinni fyrir neðan má sjá hvernig niðurstöður eru settar fram á mælitölukvarða þar sem:

• Lóðrétti ásinn sýnir mælitölur frá 1-19.

• Brotalínan táknar landsmeðaltalið sem er alltaf stillt á mælitöluna 10.

• Svarti punkturinn sýnir frammistöðu nemandans.

Nemandinn sem myndin lýsir fékk mælitöluna 10 sem er færni í meðallagi. Með því að færa músarbendilinn yfir svarta punktinn fást einnig helstu upplýsingar um frammistöðu nemandans. Til hliðar við kvarðann má svo sjá lýsingu á því hvað einkennir stöðu nemenda í lesskilningi á hverju mælitölubili ásamt almennum upplýsingum um nauðsynlegar áherslur í námi.

Niðurstöður nemanda eru birtar á tvo til þrjá inntaksflokka en flokkarnir eru tveir í prófútgáfum fyrir 4.-7. bekk og þrír fyrir 8.-10. bekk. Flokkarnir eru eins og fyrr segir í handbókinni að staðsetja og endurheimta, að álykta og túlka og að ígrunda og meta. Undir hverjum inntaksflokki er stutt lýsing til skýringar. Til hliðar við lýsinguna er kvarði og punktur með öryggisbili sem sýnir frammistöðu nemandans á hverjum inntaksflokki.

Sett er fram þrenns konar lýsing eða flokkun á frammistöðu nemenda innan inntaksflokkanna:

• Ræður vel við: Prófatriði sem 75% eða hærri líkur eru á að nemandi með þessa mælitölu ráði við.

• Á mörkum að ráða við: Prófatriði sem 50-74% líkur eru á að nemandi með þessa mælitölu ráði við.

• Ræður illa við: Prófatriði sem 33-49% líkur eru á að nemandi með þessa mælitölu ráði við.

Með því að opna hvern flokk birtast atriðalýsingar sem endurspegla hvers konar hæfni er metin á lesskilningsprófinu og að hvaða marki nemandinn hefur náð tökum á henni ef hann læsi texta af sambærilegri þyngd.

Staða hóps á lesskilningsprófi er sett fram sem hlutfall nemenda á hverju mælitölubili með samanburði við landið. Efri súlan sýnir hlutfallið á landsvísu.

Á landsvísu fær:

• 21% nemenda mælitölurnar 1-7 en þetta eru nemendur sem þurfa stuðning og eftirfylgni vegna slaks lesskilnings.

• 58% nemenda á landsvísu mælitölurnar 8-12 og eru á og við meðaltal.

• 21% nemenda fá mælitölurnar 13-19 sem er betri frammistaða en hjá jafnöldrum á landsvísu.

Mikilvægt er að túlka meðaltöl fyrir litla hópa, svo sem með færri en 10 nemendur, með fyrirvara þar sem frammistaða einstakra nemenda getur haft mikil áhrif á meðaltal bekkjarins.

Neðri súlan sýnir stöðu bekkjarhóps og hlutfall nemenda innan mælitölubila. Í þessum tiltekna hópi er hlutfall nemenda sem fá mælitölurnar 1-7 á lesskilningsprófi aðeins hærra en á landsvísu eða 23%. Svo lítinn mun er þó rétt að túlka með það í huga að í þessum bekk eru aðeins 12 nemendur. Ef aðeins einn nemandi til viðbótar hefði sýnt frammistöðu á pari við jafnaldra hefði þetta hlutfall verið lægra en á landsvísu. Hlutfall nemenda sem sýnir betri frammistöðu en jafnaldrar er 44% og því talsvert hærra en á landsvísu.

Staða hóps á lesskilningsprófi er einnig sett fram á mynd þar sem meðaltal hans er gefið upp á mælitölu. Meðaltal hóps er táknað með svörtum punkti og landsmeðaltal er sýnt með brotalínu. Í dæminu á myndinni er meðaltal hópsins á mælitölunni 10, sem er við landsmeðaltal. Minni punktarnir tákna niðurstöðu einstakra nemenda. Með því að færa músarbendilinn yfir punkt og smella á hann opnast einstaklingsniðurstöður viðkomandi nemanda.

Þrátt fyrir að frammistaða hópsins sé á landsmeðaltali þarf að huga sérstaklega að nemendum sem fá mælitölurnar 5-7. Í dæminu á myndinni eru fimm nemendur á því mælitölubili. Einnig þarf að fylgjast vel með nemendum sem fá mælitölurnar 8 og 9 þar sem þeir eru í neðri mörkum meðaltals og enn kann að vanta nokkuð upp á að lesskilningur þeirra styðji þá í námi. Alltaf skal stefnt að því að nemendur nái upp að meðaltali eða hærra þar sem góður lesskilningur er mikilvæg forsenda fyrir samfélagsþátttöku og árangri í námi.

Niðurstöður nemenda innan hóps eru teknar saman í töflu eins og sýnd er hér að neðan. Hægt er að sía niðurstöðurnar og raða upplýsingum í hverjum dálki. Stafrófsröð er sjálfgefin en einnig er hægt að raða niðurstöðum t.d. eftir lægsta gildi. Þannig geta kennarar flokkað niðurstöður eftir mælitölubilum og séð auðveldlega hvaða nemendur, og þá hversu margir, glíma við vanda og þurfa stuðning.

Eins og áður hefur verið fjallað um er lesskilningur háður fjöldamörgum þáttum sem gerir það að verkum að töluverða vinnu og tíma þarf til að styrkja undirstöður hans og ná fram auknum árangri hjá nemendum. Oft þarf að vinna markvisst með lestrarfærni nemenda samhliða því að styrkja málskilning með skipulegri nálgun í kennslu nýs orðaforða í öllum námsgreinum. Efling lesskilnings tekur því langan tíma og ekki nauðsynlegt að meta framfarir nemenda á stöðluðu prófi oftar en árlega. Mikilvægt er að niðurstöðurnar séu alltaf hafðar til hliðsjónar í tengslum við túlkun á niðurstöðum lesfimiprófs og sem hluti af heildrænu mati á stöðu nemenda í lestri.