Greiðsluaðlögun - úrræði við skuldavanda

Samið er um allar skuldir sem voru stofnaðar áður en umsókn var samþykkt sem samkvæmt lögum er heimilt að semja um.

Samningur er samþykktur þegar allir kröfuhafar sem lýstu kröfu teljast hafa samþykkt skilmála hans. Þegar samningur tekur gildi lýkur greiðsluskjóli.

Tímabil greiðsluaðlögunar er sniðið að aðstæðum viðkomandi og er alla jafna 1 - 3 ár. Það fer eftir greiðslugetu skuldara hvort greitt er af kröfum á tímabili greiðsluaðlögunar. Tillögur um eftirgjöf skulda eru byggðar á heildarmati, s.s. aðstæðum og greiðslugetu skuldara til framtíðar.

Greiðsluaðlögun getur falið í sér t.d.:

• greiðslur í samræmi við greiðslugetu á tímabili greiðsluaðlögunar og eftir atvikum niðurfellingu skulda við lok greiðsluaðlögunar

• greiðslur í samræmi við greiðslugetu á tímabili greiðsluaðlögunar og uppgreiðslu skulda

• gjaldfrest af kröfum á tímabili greiðsluaðlögunar ef um tímabundna greiðsluerfiðleika er að ræða

• gjaldfrest af kröfum á tímabili greiðsluaðlögunar og niðurfellingu skulda við lok greiðsluaðlögunar

Ef greiðslugeta er til staðar er greidd föst mánaðarleg afborgun til banka sem sér um að miðla greiðslum til kröfuhafa.

Veðkröfur

Hægt er að semja um tímabundið lægri afborgun af veðkröfum eða gjaldfrest. Þetta á við um fasteignaveðkröfur og aðrar veðkröfur til dæmis vegna bílalána.

Kröfur sem eru undanþegnar niðurfellingu

Samkvæmt lögum um greiðsluaðlögun falla ákveðna kröfur utan greiðsluaðlögunar í þeim skilningi að ekki er heimilt að fella þær niður, t.d. námslán, virðisaukaskattur, afdregin vangoldin staðgreiðsla opinberra gjalda, fésektir, skaðabótakröfur og meðlagsskuldir. Þá tekur greiðsluaðlögun ekki til krafna sem verða til eftir að umsókn er samþykkt.

Sérstakar heimildir samkvæmt lögunum

• Námslán: Heimilt er að semja um frystingu námslána í samningi um greiðsluaðlögun. Ef samningur næst um greiðsluaðlögun er vanskilum skeytt við höfuðstól kröfunnar við lok greiðsluaðlögunar.

• Fésektir: Heimilt er að semja um að hafa fésektir sem hluta af greiðsluáætlun samnings. Ef það er ekki gert, þarf skuldari að semja sjálfur um greiðslu fésekta hjá sýslumanni.

• Meðlagsskuldir: Heimilt er að semja um að hafa meðlagsskuldir sem hluta af greiðsluáætlun samnings eða kveða á um gjaldfrest á þeim. Ef það er ekki gert, þarf skuldari sjálfur að semja um greiðslu meðlagsskulda hjá sýslumanni.

• Virðisaukaskattur, staðgreiðsla: Heimilt er að semja um að hafa þessar skattaskuldir sem hluta af greiðsluáætlun samnings eða kveða á um gjaldfrest á þeim. Sé það ekki gert þarf skuldari sjálfur að semja um greiðslu skuldanna hjá Skattinum eða sýslumönnum utan höfuðborgarsvæðisins.

Til baka: Ábyrgð og skyldur í greiðsluskjóli

Áfram: Eignir þínar