Greiðsluaðlögun - úrræði við skuldavanda

Umsjónarmaður er lögfræðingur á vegum umboðsmanns skuldara.

Hlutverk umsjónarmanns er að gera tillögu að samningi til greiðsluaðlögunar í samvinnu við umsækjanda og annast samningaviðræður við kröfuhafa.

Umsjónarmaður er skipaður um leið og umsókn um greiðsluaðlögun er samþykkt.

Sami lögfræðingur og samþykkir umsókn er alla jafna skipaður umsjónarmaður.

Mikilvægt er að umsækjandi sinni samskiptum við umsjónarmann vel.

Sýni umsækjandi ekki samstarfsvilja kann það að leiða til þess að greiðsluaðlögunarumleitanir verði felldar niður.

Í greiðsluaðlögun er veitt tímabundið hlé frá innheimtuaðgerðum. Þetta er kallað greiðsluskjól.

Í greiðsluskjóli fæst svigrúm til að endurskipuleggja fjármál og leita lausna á skuldavanda.

Greiðsluskjól varir frá því umsókn er samþykkt og þar til samningur hefur tekið gildi.

Nánari upplýsingar um ábyrgð og skyldur í greiðsluskjóli.

Umsjónarmaður birtir auglýsingu í Lögbirtingablaði um að þú hafir verið samþykktur í greiðsluaðlögun. Auglýsingin heitir innköllun.

Með innkölluninni er kröfuhöfum þínum (einstaklingum eða fyrirtækjum) veittur þriggja vikna frestur til að lýsa kröfum sínum. Í því felst að kröfuhafar senda embættinu upplýsingar um kröfurnar í formi kröfulýsinga.

Með því að lýsa kröfu fá kröfuhafar rétt til að andmæla tillögu að greiðsluaðlögunarsamningi.

Í samráði við þig stillir umsjónarmaður upp tillögu að samningi.

Samningur tekur mið af aðstæðum þínum, greiðslugetu og umfangi skulda.

Greiðsluaðlögun getur falið í sér t.d.:

• greiðslur í samræmi við greiðslugetu þína í tiltekinn tíma og eftir atvikum niðurfellingu skulda við lok greiðsluaðlögunar

• gjaldfrest af kröfum í tiltekinn tíma ef um tímabundna erfiðleika er að ræða

• gjaldfrest af kröfum í tiltekinn tíma og niðurfellingu skulda við lok greiðsluaðlögunar

Nánari upplýsingar um samninga.

Tillaga að samningi er send til allra kröfuhafa sem lýstu kröfu í ferlið. Aðrir kröfuhafar fá tilkynningu um að samningaviðræður séu hafnar en komist samningur á eru þeir bundnir af niðurstöðu hans, þar sem þeir lýstu ekki kröfu.

Kröfuhafar fá tveggja vikna frest til að taka afstöðu til samningsins. Kröfuhafar geta þannig andmælt samningnum eða komið með athugasemdir.

Samningur telst samþykktur þegar allir kröfuhafar sem lýstu kröfu hafa samþykkt hann. Ef engin mótmæli berast áður en fresturinn rennur út, telst samningur kominn á.

Það er hlutverk umsjónarmanns að fá kröfuhafa til að endurskoða neikvæða afstöðu sína, eftir atvikum með því að gera í samráði við skuldara breytingar á samningnum.