Dvalarleyfi af mannúðarástæðum

Dvalarleyfi af mannúðarástæðum er að hámarki veitt til eins árs.

Dveljist handhafi leyfisins lengur en þrjá mánuði samfellt erlendis getur dvalarleyfið verið fellt niður. Dvalarleyfi útlendings fellur sjálfkrafa niður þegar lögheimili hans, sem skráð var hér á landi, hefur verið skráð erlendis í þrjá mánuði.

Þrátt fyrir að dvalarleyfi hafi fallið niður er hægt að sækja um endurnýjun á dvalarleyfi, ef það er gert innan gildistíma fyrra dvalarleyfis og sanngirnisástæður mæla með því.

Réttur til fjölskyldusameiningar

Dvalarleyfi af mannúðarástæðum veitir ekki rétt til fjölskyldusameiningar fyrr en eftir að það hefur verið endurnýjað tvisvar sinnum.

Það má veita undanþágu frá þessu skilyrði ef ríkar sanngirnisástæður mæla með því vegna aðkallandi umönnunarsjónarmiða.

Dvalarleyfi af mannúðarástæðum veitir handhafa rétt til fjölskyldusameiningar við

• maka,

• börn sín yngri en 18 ára, ef handhafi hefur forsjá þeirra,

• foreldra 67 ára og eldri.

Réttur til að vinna

Dvalarleyfinu fylgir heimild til að vinna án atvinnuleyfis.

Réttur til endurnýjunar leyfis

Þú þarft að sækja um endurnýjun dvalarleyfis áður en leyfið þitt rennur út.

Aðeins er heimilt að endurnýja dvalarleyfi á grundvelli mannúðarleyfis, ef upphaflegar forsendur fyrir veitingu leyfisins hafa ekki breyst. Þetta þýðir að við afgreiðslu umsóknar um endurnýjun verður Útlendingastofnun að leggja nýtt mat á forsendur þess að þú fékkst veitt mannúðarleyfi.

Ef skilyrði mannúðarleyfisins eru áfram uppfyllt verður leyfi þitt endurnýjað. Sé það mat stofnunarinnar að skilyrðin séu ekki lengur uppfyllt, færð þú boð í viðtal þar sem þér verður leiðbeint um möguleika þína til að sækja um dvalarleyfi á öðrum grundvelli. Uppfyllir þú skilyrði þess leyfis sem þú sækir um, færðu heimild til að dvelja áfram á Íslandi. Ef þú sækir ekki um annað dvalarleyfi, eða uppfyllir ekki skilyrði þess leyfis sem þú sækir um, færð þú boð í viðtal vegna hugsanlegrar afturköllunar á mannúðarleyfi þínu.

Afturköllun mannúðarleyfis þíns hefur áhrif á heimildir aðstandenda þinna til dvalar á Íslandi, ef þeir eru með dvalarleyfi á grundvelli fjölskyldusameiningar við þig.

Þú getur kært ákvörðun um afturköllun mannúðarleyfis til kærunefndar útlendingamála.

Réttur til ótímabundins dvalarleyfis

Dvalarleyfið getur verið grundvöllur ótímabundins dvalarleyfis.

Athugið að eitt af skilyrðum ótímabundins dvalarleyfis er að hafa ekki hafa dvalist meira en 90 daga erlendis samtals á hverju ári á gildistíma dvalarleyfis, talið frá útgáfudegi leyfis.