Slysatrygging – umsókn um bætur vegna slyss

Slysabætur eru greiddar þeim sem uppfylla eftirfarandi:

Þar að auki er forenda þess að sjúkrakostnaður fáist endurgreiddur að hann hafi ekki þegar verið greiddur af sjúkrasjóði, tryggingafélagi eða öðrum aðilum. Ef sótt er um á röngum forsendum getur umsækjandi verið endurkrafinn um greiðslurnar að viðbættum dráttarvöxtum.

1. Að hafa lent í óvæntu slysi

Umsækjandi þarf að hafa lent í óvæntu slysi, en með því er átt við atburð sem:

• er skyndilegur og óvæntur

• veldur meiðslum á líkama

• áhorfandi getur áttað sig á að hafi gerst

• gerist án vilja hins slasaða

• verður ekki rakinn til undirliggjandi sjúkdóms hins slasaða

• sé frávik frá þeirri atburðarrás sem búast mátti við
  

2. Að vera slysatryggð

Launþegar eru slysatryggðir ef þeir:

• starfa hér á landi, án tilliti til aldurs

• starfa um borð í skipi eða loftfari, íslensku eða gert út af íslenskum aðilum, og fá greidd laun hér á landi

Sjálfstætt starfandi eru slysatryggðir ef þeir:

• eru atvinnurekendur í landbúnaði
  - einnig tryggjast makar þeirra og börn á aldrinum 13-17

• starfa sjálfstætt í öðrum atvinnugreinum en landbúnaði

• útgerðarmenn sem sjálfir eru skipverjar

Nemendur eru slysatryggðir ef þeir eru í:

• eru í löggiltu iðnnámi

• starfsnámi í heilbrigðisgreinum eða raunvísindum
  - verklegu námi við háskóla

Þar að auki teljast slysatryggðir:

• Íþróttafólk, ef slys við íþróttiðkun uppfyllir skilyrði bótaskyldu

• Björgunarsveitarfólk, ef slys við björgun uppfylir skilyrði bótaskyldu

• Þeir sem slasast við heimilisstörf og merktu í viðeigandi reit á skattframtali, ef slys við heimilisstörf uppfyllir skilyrði bótaskyldu

3. Að slysið sé bótaskylt

Bótaskyld slys geta verið vinnuslys, sjóslys, og slys við heimilisstörf, íþróttaiðkun, björgunarstörf eða iðnnám. Þó eru ekki bótaskyld bílslys sem eiga sér stað 2014 eða síðar ef þau eru bótaskyld hjá vátryggingarfélagi samkvæmt lögboðinni ábyrgðartryggingu ökutækis eða lögboðinni slysatryggingu ökumanns og eiganda.

Vinnuslys

Vinnuslys teljast bótaskyld ef viðkomandi var við vinnu er slys varð og fékk greidd laun eða reiknaði sér endurgjald vegna vinnunnar. Fyrrnefnd undanþága frá bótaskyldu vegna bílslyss á við þó um vinnu sé að ræða. Slasaði telst vera við vinnu í:

• vinnustað á vinnutíma, þar með talið matar- og kaffitíma.

• sendiferðum samdægurs fyrir vinnustað

• ferðum samdægurs milli vinnustaðar og heimilis

• lengri ferðum, svo lengi sem starfsmaður er á launum í ferðinni

Sjóslys

Sjóslys teljast bótaskyld ef viðkomandi fékk greidd laun vegna vinnu eða reiknaði sér endurgjald vegna vinnunnar.

Slys við heimilisstörf

Slys við heimilisstörf geta verið bótaskyld ef hakað var við trygginguna á viðeigandi skattframtali. Slysatryggingin gildir frá 1. júní á árinu sem framtali er skilað til 31. maí árið eftir (fylgir álagningartímabili). Ekki er unnt að óska eftir slysatryggingu eftir að skattyfirvöld móttaka framtal.

Heimilisstörfin þurfa að hafa verið innt af hendi hér á landi á heimili hins tryggða eða sumarbústað sem hann dvelur í, þar með talið í bílskúrum, geymslum, afmörkuðum garði eða innkeyrslum.

Heimilisstörf sem eru slysatryggð eru meðal annars:

• hefðbundin heimilisstörf, svo sem matseld og þrif

• umönnun sjúkra, aldraðra og barna

• viðhaldsverkefni og viðgerðir

• hefðbundin garðyrkjustörf

Undanskilin slysatryggingu eru meðal annars:

• slys við daglegar athafnir sem eru ekki hefðbundin heimilisstörf, svo sem að klæða sig, baða og borða

• slys á ferðalögum, svo sem í tjaldi, hjólhýsi og hótelum

Slys við íþróttaiðkun

Slys íþróttafólks eru tryggð ef hinn slasaði er 16 ára eða eldri, tekur þátt íþróttaiðkun og slasast við æfingar, sýningar eða keppni. Með íþróttaiðkun er átt við að viðkomandi æfi reglubundið hjá íþróttafélagi innan vébanda Íþrótta- og Ólympiusambands Íslands (ÍSÍ).

Slys við björgunarstörf

Slys við björgunarstörf eru slysatryggð ef hinn slasaði vann að björgun manna úr lífsháska, eða vörnum gegn öðru yfirvofandi meiriháttar tjóni.

Slys við iðn- eða verknám

Slys er verða í verklegum tíma eða við vinnu sem tengist iðnnámi eða öðru námi geta verið bótaskyld ef forsendunni um óvænt slys er fullnægt.

Atvinnusjúkdómar

Sjúkdómar sem orsakast af vinnu eða aðstæðum í vinnuumhverfi teljast einnig slysatryggðir þó ekki sé beinlínis um slys að ræða. Sótt er um eins og um vinnuslys sé að ræða.

4. Að slysið sé tilkynnt tímanlega

Að jafnaði ber öll slys að tilkynna innan eins árs. Ef vandkvæðum er háð að fá undirritun atvinnurekanda á tilkynningu má leita aðstoðar lögregu.

Ef meira en ár er liðið frá slysdegi þar til slys er tilkynnt, en minna en tíu ár, má taka tilkynningu til skoðunar svo lengi sem:

• atvik slyss eru alveg ljós

• töfin torveldar ekki gagnaöflun um atriði sem skipta máli

• unnt er að meta orsakasamband slyssins og heilsutjóns slasaða