Rekstur heilbrigðisþjónustu

Landlæknir gefur út staðfestingu á að rekstur heilbrigðisþjónustu uppfylli faglegar lágmarkskröfur og önnur skilyrði í heilbrigðislöggjöf.
Mikilvægt er að tilkynningar og umsóknir séu vel útfylltar og að þeim fylgi öll tilskilin gögn. Umbeðin gögn eru forsenda þess að landlæknir geti metið hvort hægt sé að staðfesta að reksturinn teljist uppfylla faglegar lágmarkskröfur.
Staðfesting á að rekstraraðili uppfylli faglegar lágmarkskröfur er ekki gefin út fyrr en öll tilskilin gögn liggja fyrir og að engar frekari kröfur eru gerðar af hálfu embættis landlæknis.
Afgreiðslutími er breytilegur eftir umfangi.

Tilkynning um rekstur heilbrigðisþjónustu

Samkvæmt 6. gr. laga um landlækni og lýðheilsu þarf að tilkynna fyrirhugaðan rekstur heilbrigðisþjónustu til embættis landlæknis sem staðfestir hvort reksturinn uppfylli faglegar kröfur og önnur skilyrði í heilbrigðislöggjöfinni.

Tilkynning um lyfjafræðilegaþjónustu í apótekum

Apótekum sem hyggjast veita lyfjafræðilega þjónustu í apótekum, samkvæmt samningi við Sjúkratryggingar, ber samkvæmt 6. gr. laga um landlækni og lýðheilsu að tilkynna fyrirhugaðan rekstur til embættis landlæknis sem staðfestir hvort reksturinn uppfylli faglegar kröfur og önnur skilyrði í heilbrigðislöggjöfinni.

Umsókn um rekstrarleyfi neyslurýmis

Neyslurými býður upp á skaðaminnkandi úrræði og heilbrigðisþjónustu.

Neyslurými er lagalega verndað umhverfi þar sem neytendur sem eru 18 ára og eldri geta notað ávana- og fíkniefni undir eftirliti starfsfólks og gætt er fyllsta hreinlætis, öryggis og sýkingavarna.

Sveitarfélög, heilbrigðisstofnanir eða frjáls félagasamtök sem hyggjast hefja starfsemi neyslurýmis, skulu sækja um rekstrarleyfi til embættis landlæknis í samræmi við 4. gr reglugerðar um neyslurými.

Sveitarfélagi, heilbrigðisstofnun eða frjálsum félagasamtökum er óheimilt að hefja starfsemi neyslurýmis, nema leyfi embættis landlæknis liggi fyrir. Embætti landlæknis er heimilt að veita leyfið til takmarkaðs tíma og með öðrum skilyrðum sem embættið telur við eiga. Óheimilt er að breyta forsendum sem liggja til grundvallar starfsleyfinu, nema að fengnu samþykki embættis landlæknis.

Gátlisti fyrir umsókn um rekstrarleyfi neyslurýmis
Nánari upplýsingar um neyslurými á vef Rauða krossins.

Tilkynning um rekstur heilbrigðisþjónustu sem veitir útlitsbreytandi meðferðir með fylliefnum

Samkvæmt reglugerð um takmarkanir á útlitsbreytandi meðferðum með fylliefnum þarf að tilkynna fyrirhugaðan rekstur til embættis landlæknis sem staðfestir hvort reksturinn uppfylli skilyrði reglugerðar.

Meðferðir þær sem reglugerð þessi kveður á um er eingöngu heimilt að veita á starfsstofu heilbrigðisstarfsmanns að undangenginni tilkynningu til landlæknis um veitingu þessara meðferða, sbr. 2. mgr. 6. gr. laga um landlækni og lýðheilsu, nr. 41/2007, og staðfestingu landlæknis að reksturinn uppfylli faglegar kröfur, sbr. 3. mgr. 6. gr. sömu laga.

Rekstraraðilum ber að tilkynna til landlæknis ef meiri háttar breytingar verða á mönnun, búnaði, starfsemi og þjónustu rekstraraðila sbr. 2. mgr. 6 gr. laga um landlækni og lýðheilsu.

Breytt heiti og kennitala rekstraraðila

Breytt heiti og kennitala ábyrgðaraðila reksturs

Breytt starfsstöð/heimilisfang

Breytt heiti starfsstofu en sama húsnæði

Breytt sjúkraskrárkerfi

Breytt heilbrigðisþjónusta

Breyting á ábyrgðaraðila sjúkraskráa

Breyting á umsjónaraðila sjúkraskráa

Breyting á búnaði og tækjakosti

Breyting á fjarheilbrigðisþjónustukerfi

Umsókn um breytingu á rekstrarleyfi neyslurýmis

Sveitarfélög sem hyggjast breyta starfsemi neyslurýmis skulu sækja um það til embættis landlæknis í samræmi við 4. gr. reglugerðar um neyslurými nr. 170/2021.

Umsókn um veitingu fjarheilbrigðisþjónustu

Skilyrði fyrir því að geta sótt um veitingu fjarheilbrigðisþjónustu er að vera með staðfestan rekstur frá embætti landlæknis.

Þá er áréttað að rekstur heilbrigðisþjónustu, þ.m.t. fjarheilbrigðisþjónustu, ber að uppfylla faglegar lágmarkskröfur til reksturs heilbrigðisþjónustu sbr. lög um heilbrigðisþjónustu, lög um landlækni og lýðheilsu, reglugerð um eftirlit landlæknis með rekstri heilbrigðisþjónustu og faglegar lágmarkskröfur, fyrirmæli landlæknis um upplýsingaöryggi við veitingu fjarheilbrigðisþjónustu og fyrirmæli landlæknis um öryggi og gæði sjúkraskráa.

Umsókn heilbrigðisstarfsmanns um undanþágu til að veita heilbrigðisþjónustu á eigin starfsstofu eftir 75 ára aldur

Skilyrði fyrir undanþágu

Samkvæmt 26. gr. laga um heilbrigðisstarfsmenn er heilbrigðisstarfsmanni óheimilt að reka eigin starfsstofu eftir að hann nær 75 ára aldri. Hins vegar má sækja um undanþágu frá þessu ákvæði. Samkvæmt reglugerð um skilyrði þess að fá undanþágu til að veita heilbrigðisþjónustu á eigin starfsstofu eftir 75 ára aldur skal umsækjandi um undanþágu uppfylla eftirfarandi skilyrði:

Vera andlega og líkamlega fær um að starfrækja þá starfsemi sem sótt er um undanþágu til.
Hafa viðhaldið þekkingu sinni, faglegri færni og tileinkað sér nýjungar.

Umsókn og fylgiskjöl

Með umsókn skulu fylgja upplýsingar um tegund og umfang starfsemi síðastliðið ár.
Skila þarf inn læknisvottorði frá heimilislækni eða öldrunarlækni, sem er ekki eldra en sex mánaða, sem vottar að umsækjandi sé andlega og líkamlega fær um að stunda þá starfsemi sem undanþágan tekur til.
Skila þarf inn yfirliti og gögnum um endurmenntun, námskeið og/eða annað sem staðfestir viðhald faglegrar þekkingar, faglegrar færni og að umsækjandi hafi tileinkað sér nýjungar síðastliðin fimm ár.