Fjarheilbrigðisþjónusta

Með fjarheilbrigðisþjónustu er átt við það þegar upplýsinga- og fjarskiptatækni er notuð til að veita heilbrigðisþjónustu án þess að sjúklingur og heilbrigðisstarfsmaður séu á sama stað. Fjarheilbrigðisþjónusta er ört vaxandi hluti almennrar heilbrigðisþjónustu, bæði hér á landi og víðar.

Tækifærin sem fólgin eru í fjarheilbrigðisþjónustu eru mikil og fjölþætt en í grunninn má segja að hún færi heilbrigðiskerfið nær sjúklingnum. Þetta getur sparað heilbrigðiskerfinu og sjúklingnum kostnað og tíma, ásamt því að minnka álag á heilbrigðisstofnunum.

Rétt eins og þegar um hefðbundna heilbrigðisþjónustu er að ræða, er brýnt að almenningur eigi kost á öruggri fjarheilbrigðisþjónustu og að samskipti einstaklings og heilbrigðisstarfsmanna séu örugg.

Með það fyrir augum að tryggja öryggi þeirra sem nýta sér fjarheilbrigðisþjónustu hefur embætti landlæknis gefið út fyrirmæli sem gilda um heilbrigðisstofnanir og heilbrigðisstarfsmenn sem hyggjast veita fjarheilbrigðisþjónustu. Þetta er nauðsynlegt og endurspeglar sömu kröfur og gerðar eru almennt til samskipta heilbrigðisstarfsmanna og sjúklinga, það er að fyllsta öryggis sé gætt við skráningu, meðferð og vistun gagna sem oft á tíðum innihalda viðkvæmar persónuupplýsingar. Þá er það von embættis landlæknis að fyrirmælin nýtist þeim fyrirtækjum, sem þróa lausnir til veitingar heilbrigðisþjónustu, við að hanna lausnir sínar á öruggan hátt og gera þeim auðveldara að tryggja að lausnir þeirra uppfylli kröfur persónuverndarlaga um m.a. öryggi og innbyggða og sjálfgefna persónuvernd.

• Skýrsla starfshóps heilbrigðisráðherra um eflingu fjarheilbrigðisþjónustu 2018. Þar er að finna tillögur um áframhaldandi uppbyggingu og framþróun á skipulagi og framkvæmd fjarheilbrigðisþjónustu hér á landi.

• Öryggi og gæði sjúkraskráa. Fyrirmæli landlæknis. Útgefið 2015

• Fyrirmæli landlæknis um upplýsingaöryggi við veitingu fjarheilbrigðisþjónustu. Útgefið 2019