Fjarheilbrigðisþjónusta

Tilkynning um veitingu fjarheilbrigðisþjónustu - eyðublað

Skilyrði fyrir því að geta sótt um veitingu fjarheilbrigðisþjónustu er að vera með staðfestan rekstur frá embætti landlæknis.

Þeir sem hyggjast veita heilbrigðisþjónustu með fjarheilbrigðistækni er skylt að sækja um það sérstaklega. Óheimilt er að hefja starfsemina fyrr en landlæknir hefur staðfest að reksturinn uppfylli faglegar kröfur og önnur skilyrði í heilbrigðislöggjöfinni.

Með tilkynningunni skulu fylgja fullnægjandi upplýsingar um starfsemina, þar með talið:

Rökstuðningur sem sýnir fram á réttmæti notkunar fjarheilbrigðisþjónustu í stað nærþjónustu, m.a. með því að tilgreina forsendur fyrir notkun fjarþjónustu, afmörkun hennar, innihald, sjúklingaval og fyrirkomulag. Einnig hvernig öryggi sjúklinga sé tryggt með aðgengi þeirra að þjónustunni.
Fræðigreinar eða heimildir. Þegar um er að ræða fjarþjónustu sem er nýjung innan viðkomandi heilbrigðisgreinar er rétt að leggja fram gögn, ef til eru, um rannsóknir eða úttektir sem styðja við notkun fjarheilbrigðisþjónustu innan greinarinnar.

Þá er áréttað að rekstur heilbrigðisþjónustu, þ.m.t. fjarheilbrigðisþjónustu, ber að uppfylla faglegar lágmarkskröfur til reksturs heilbrigðisþjónustu sbr. lög um heilbrigðisþjónustu, lög um landlækni og lýðheilsu, reglugerð um eftirlit landlæknis með rekstri heilbrigðisþjónustu og faglegar lágmarkskröfur, fyrirmæli landlæknis um upplýsingaöryggi við veitingu fjarheilbrigðisþjónustu og fyrirmæli landlæknis um öryggi og gæði sjúkraskráa.

Með fjarheilbrigðisþjónustu er átt við það þegar upplýsinga- og fjarskiptatækni er notuð til að veita heilbrigðisþjónustu án þess að sjúklingur og heilbrigðisstarfsmaður séu á sama stað. Fjarheilbrigðisþjónusta er ört vaxandi hluti almennrar heilbrigðisþjónustu, bæði hér á landi og víðar.

Tækifærin sem fólgin eru í fjarheilbrigðisþjónustu eru mikil og fjölþætt en í grunninn má segja að hún færi heilbrigðiskerfið nær sjúklingnum. Þetta getur sparað heilbrigðiskerfinu og sjúklingnum kostnað og tíma, ásamt því að minnka álag á heilbrigðisstofnunum.

Rétt eins og þegar um hefðbundna heilbrigðisþjónustu er að ræða, er brýnt að almenningur eigi kost á öruggri fjarheilbrigðisþjónustu og að samskipti einstaklings og heilbrigðisstarfsmanna séu örugg.

Með það fyrir augum að tryggja öryggi þeirra sem nýta sér fjarheilbrigðisþjónustu hefur embætti landlæknis gefið út fyrirmæli sem gilda um heilbrigðisstofnanir og heilbrigðisstarfsmenn sem hyggjast veita fjarheilbrigðisþjónustu. Þetta er nauðsynlegt og endurspeglar sömu kröfur og gerðar eru almennt til samskipta heilbrigðisstarfsmanna og sjúklinga, það er að fyllsta öryggis sé gætt við skráningu, meðferð og vistun gagna sem oft á tíðum innihalda viðkvæmar persónuupplýsingar. Þá er það von embættis landlæknis að fyrirmælin nýtist þeim fyrirtækjum, sem þróa lausnir til veitingar heilbrigðisþjónustu, við að hanna lausnir sínar á öruggan hátt og gera þeim auðveldara að tryggja að lausnir þeirra uppfylli kröfur persónuverndarlaga um m.a. öryggi og innbyggða og sjálfgefna persónuvernd.