Tilvísun í sálfræðiþjónustu

Læknir á heilsugæslustöð sendir tilvísun til sálfræðiþjónustu.

Þjónusta sálfræðinga

Börnum og unglingum sem vísað er í sálfræðiþjónustu er fljótlega boðið matsviðtal þar sem vandi er kortlagður og viðeigandi úrræði metið. Þegar börn eru tólf ára og yngri fá foreldrar senda greiningarlista og matsviðtal er öllu jöfnu tekið í síma.

Eldri börn mæta með foreldrum í matsviðtal. Úrræði innan sálfræðiteymis HSU geta falið í sér einstaklingsviðtöl þar sem veitt er sérhæfð sálfræðimeðferð, hópmeðferð (t.d. Hjálp fyrir kvíðin börn), fjarmeðferð (Flikk), ráðgjafaviðtöl og/eða fræðsla. Ef vandi talinn betur mætt af öðrum þjónustuaðilum er tilvísanda eða foreldrum leiðbeint um næstu skref.

Sálfræðingar HSU eru í virku samstarfi við annað heilbrigðisstarfsfólk, fagfólk sveitarfélaga og aðrar stofnanir sem veita stuðning og meðferð vegna geðvanda barna.

Sálfræðingar sinna skimun fyrir þroskatengdan vanda barna að þriggja ára aldri í samstarfi við ungbarnavernd en framkvæma annars ekki þroskagreiningar. Þá eru sálfræðingar hluti af ADHD teymi HSU, Fókus til framtíðar, þar sem þeir veita aðstoð við val á meðferðarúrræðum og koma að fræðslu til foreldra.

Sálfræðiteymi veitir sálfræðimeðferð fyrir vægan til miðlungs alvarlegan geðvanda fullorðinna.

Þjónustan er veitt samkvæmt verklagi ÞÁS sem felur í sér þrepaskipta, árangursmælda og samræmda meðferð. Leitast er við að veita ítarlegt matsviðtal innan við mánaðar eftir að tilvísun berst þar sem vandi er greindur og hentugt úrræði fundið.

Sálfræðingar veita sérhæfa meðferð eftir eðli og alvarleika vanda. Verðandi mæður og foreldrar barna á fyrsta aldursári hljóta forgang um þjónustu.

Sálfræðiteymi HSU veitir áfallaaðstoð til einstaklinga vegna nýrra áfalla. Tilvísanir berast frá læknum, hjúkrunarfræðingum eða sjúkraflutningamönnum HSU, prestum, lögreglu og velferðarþjónustu sveitarfélaga. Dæmi um atburði sem leiða til áfallaviðbragðs eru alvarleg slys, skyndileg dauðsföll og/eða ofbeldi.

Hvert mál er metið fyrir sig en miðað er við að veitt séu eitt til fimm viðtöl og viðkomandi leiðbeint um frekari úrvinnslu gerist þess þörf. Mælst er til að nýjum áföllum vegna kynferðis- og eða heimilisofbeldis sé vísað í sérhæfð teymi Landspítala.

Meðferðaraðilar sálfræðiteymis setja beiðnir um aðstoð vegna áfalla í forgang og veita þjónustu eins fljótt og auðið er. Þeir sinna ekki útköllum og mæta ekki á vettvang. Sé um stærri viðburði að ræða eins og hópslys eða náttúruhamfarir er áfallateymi Rauða Krossins virkjað. Sálfræðiteymið tekur þátt í samráðshóp um áfallamál ásamt velferðarþjónustu, prestum og lögreglu.

Sálfræðingar eru í samstarfi við ljósmæður og hjúkrunarfræðinga í mæðra- og ungbarnavernd.

Fulltrúi sálfræðiþjónustu situr í þverfaglegu geðheilsuteymi og sinna sálfræðingar meðferð skjólstæðinga eftir tilvísun frá málastjóra.

Veitt er einstaklings- og hópmeðferð auk þess sem sálfræðingar koma að sameiginlegri fræðslu.

Sálfræðingar á heilsugæslustöðvum HSU eru í samstarfi við lækna, hjúkrunarfræðinga og ljósmæður stöðvarinnar. Þeir starfa í þverfaglegum teymum innan stofnunar og með öðrum stofnunum.

Samstarfsaðilar eru t.d.

• Barna- og unglingageðdeild Landspítala

• Félagsþjónusta

• Sérfræðiþjónusta skóla

• Greiningar- og ráðgjafarstöð ríkisins

• Geðheilsumiðstöð Barna

• Barnavernd

• Framhaldsskólar á Suðurlandi