Í tengslum við tjónamat í Grindavík lét NTÍ framkvæma jarðkönnun við sprungur á alls 47 lóðum.

Tjónamat í Grindavík að mestu lokið – ítarleg jarðkönnun framkvæmd til að meta hvort hús séu viðgerðarhæf

Tjónamati í Grindavík er nú að mestu lokið, en fáein mál eru enn í vinnslu. Mikilvægur þáttur í rannsókn NTÍ var jarðkönnun, framkvæmd af sérfræðingum í jarð- og jarðverkfræði frá ÍSOR, Verkís og Eflu.

Sérfræðingahópnum var falið að meta hvort tilefni væri til jarðkönnunar við einstakar eignir. Matið byggði á fyrirliggjandi kortlagningu sprungna í Grindavík, sem sömu aðilar höfðu unnið fyrir ríkislögreglustjóra og Grindavíkurbæ. Talin var þörf á jarðkönnun, þar sem grafið var með gröfu að sprungum í bergi og/eða framkvæmd nánari sjónskoðun, á samtals 47 lóðum.

Verkefnið var mjög umfangsmikið og skilaði mikilvægum niðurstöðum um hvaða eignir teljast viðgerðarhæfar og hverjar ekki. Minnisblað með lýsingu á þeim rannsóknum sem fram fóru er aðgengilegt hér.