24. janúar 2025
24. janúar 2025
Þessi frétt er meira en árs gömul
492 þreyttu íslenskupróf fyrir ríkisborgararétt
Dagana 18. nóvember til 2. desember sl. voru haldin íslenskupróf fyrir ríkisborgararétt. 84% af þeim 492 sem þreyttu prófið stóðust þær grunnkröfur sem gerðar eru til íslenskukunnáttu fyrir íslenskan ríkisborgararétt. Prófin voru haldin í 24 lotum í Reykjavík, á Akureyri, Egilsstöðum og Ísafirði en aldrei hafa fleiri verið skráð í þau.
Eitt af grunnskilyrðum sem umsækjendur um ríkisborgararétt verða að uppfylla er að hafa staðist þetta próf sem miðast við lokamarkmið í grunnnámi í íslensku fyrir útlendinga (240 stundir), samkvæmt námskrá barna- og menntamálaráðuneytisins. Það samsvarar A1-A2 færnimarkmiði út frá viðmiðunarramma Evrópuráðs fyrir erlend tungumál (Common European Framework of Reference for Languages).
Sýna þarf fram á að geta:
bjargað sér við daglegar aðstæður í skóla, vinnu og einkalífi.
bjargað sér við óvæntar aðstæður.
tekið þátt í umræðum um kunnugleg málefni.
skilið einfaldar samræður.
lesið stutta texta á einföldu máli.
skrifað stutta texta á einföldu máli.
greint aðalatriði í sjónvarpi, útvarpi og dagblaði.
Frekari upplýsingar um íslenskupróf fyrir ríkisborgararétt
Næstu íslenskupróf fyrir ríkisborgararétt eru áætluð í maí og nóvember 2025 og verða auglýst á heimasíðu Mímis, www.mimir.is.