Erfðafjárskattur

Erfðafjárskattur er greiddur af hreinni eign dánarbús sem eru eignir að frádregnum skuldum og kostnaði.

Maki í hjónabandi greiðir engan erfðafjárskatt. Sama gildir um sambúðarmaka sem stofnað hefur til óvígðrar sambúðar við arfleifanda og tekur arf eftir hann samkvæmt erfðaskrá. Geta þarf um stöðu sambúðarmaka í erfðaskrá. 

Erfðafjárskattur greiðist af þeirri fjárhæð sem er umfram skattfrelsismörk (óskattskyldur arfur). Erfingjar njóta skattfrelsis í hlutfalli við arf sinn. Dæmi: Óskattskyldur hluti er kr. 6.789.790. Ef arfshlutfall erfingja er 33,33% er óskattskyldur hluti hans kr. 2.263.037. Ef arfshlutfall erfingja er 22,22% er óskattskyldur hluti hans kr. 1.508.691.

Skattfrelsismörk breytast 1. janúar ár hvert í samræmi við vísitölu neysluverðs og eru eftirfarandi af dánarbúum sem stofnuðust: 

• 1. janúar 2026 til 31. desember 2026 6.789.790 kr.

Skattfrelsismörk gilda ekki um fyrirframgreiddan arf. Við fyrirframgreiðslu arfs er greiddur erfðafjárskattur af öllu verðmæti þeirra eigna sem verið er að afhenda.