Styrkir til einstaklinga eru almennt skattskyldir. Styrkir eru skattlagðir eins og launatekjur og bera tekjuskatt og útsvar.
Það getur verið leyfilegt að færa viðeigandi kostnað til frádráttar frá fjárhæð styrks. Ef greiddur styrkur er hærri en kostnaður er mismunurinn skattskyldur. Ef kostnaður er jafn hár eða hærri en styrkur er engin fjárhæð skattlögð. Fullgildir reikningar fyrir greiðslum þurfa alltaf að liggja fyrir.
Geymdu alltaf gögn sem sýna tilgang styrks og hvernig hann var nýttur, þar sem slíkt getur ráðið úrslitum um hvort greiðsla teljist skattskyld.
Athugið að aldrei er heimilt að færa kostnað til frádráttar frá fjárhæð styrks hafi ekki komið til kostnaðar hjá styrkþega. Aldrei er hægt að draga frá persónulegan kostnað, eignir og aðra varanlega muni.
Dæmi um kostnað sem telst aldrei til frádráttar
Kaup á gleraugum eða heyrnartækjum
Tannviðgerðir
Sálfræðiþjónusta og krabbameinsskoðun
Glasafrjóvgun og dvöl á heilsustofnunum
Kaup á fasteignum eða bifreiðum
Kaup á tölvum, tækjum eða öðrum varanlegum munum.
Nokkrar tegundir styrkja teljast ekki til skattskyldra tekna, en það heyrir til undantekninga.
Algengir styrkir og viðmið
Nokkur dæmi um algenga styrki og þau viðmið sem gilda um skattskyldu þeirra.
Styrkir frá launagreiðanda eða stéttarfélagi vegna kostnaðar við reglulega íþróttaiðkun eru skattfrjálsir upp að ákveðinni fjárhæð sem ákveðin er árlega með skattmati. Greiðslur umfram þá fjárhæð teljast skattskyldar.
Íþróttastyrkur er skattfrjáls upp að hámarki 85.000 á ári á árinu 2026 skv. skattmati
Dæmi um reglulega íþróttaiðkun
Æfingagjöld
Aðgangur að líkamsræktarstöðvum, sundlaugum, skíðasvæðum og golfvöllum
íþróttanámskeið
Einkaþjálfun
Kostnaður við búnað eða fatnað fellur ekki undir undanþáguna.
Frístundastyrkir sem greiddir eru af sveitarfélögum vegna íþróttaiðkunar eða annarra frístunda barna eru ekki skattsskyldir.
Styrkir vegna náms, námskeiða eða rannsókna teljast skattskyldar tekjur. Á móti slíkum styrkjum er heimilt að færa beinan kostnað, svo sem námskeiðsgjöld, skólagjöld, kaup á námsbókum eða ferðakostnað vegna námsins. Persónulegur kostnaður eða kostnaður vegna tækjakaupa, t.d. kaupa á tölvu, leyfist þó aldrei til frádráttar.
Samgöngustyrkir, eða samgöngugreiðslur, sem launagreiðandi greiðir starfsmanni vegna ferða milli heimilis og vinnustaðar samkvæmt sérstökum samningi um nýtingu á almenningssamgöngum eða vistvænum samgöngumáta teljast ekki til skattskyldra tekna upp að ákveðinni fjárhæð sem ákveðin er árlega með skattmati. Í skattmati er nánar kveðið á um skilyrði fyrir undanþágunni.
Samgöngustyrkur er skattfrjáls upp að hámarki 138.000 kr. á ári miðað við fullt starf, eða 11.500 kr. á mánuði skv. skattmati fyrir árið 2026.
Styrkir sem sjúkrasjóðir stéttarfélaga veita til greiðslu á útfararkostnaði eru skattskyldar tekjur og færast eftir aðstæðum hjá eftirlifandi maka eða hjá dánarbúinu. Ekki er heimill neinn frádráttur á móti. Sama gildir um útfararstyrki sem greiddir eru af öðrum, t.d. vinnuveitendum.
Styrkir til orlofsdvalar eða leigu á orlofshúsnæði eru skattfrjálsir upp að ákveðinni fjárhæð sem ákveðin er árlega með skattmati. Greiðslur umfram þá fjárhæð teljast skattskyldar.
Styrkir til orlofsdvalar eru skattfrjálsir upp að hámarki 79.000 kr. á ári á árinu 2026 skv. skattmati.
Ættleiðingarstyrkir eru skattskyldar tekjur. Ef styrkirnir eru greiddir úr ættleiðingarsjóði samkvæmt lögum er heimilt að færa frádrátt á móti. Engin heimild er til frádráttar ef styrkurinn er greiddur af öðrum en ættleiðingarsjóði.
Verkfallsstyrkir frá stéttarfélögum eru skattskyldar tekjur og eru skattlagðir samkvæmt almennum reglum eins og laun.
Undantekningar frá skattskyldu styrkja
Nokkrar tegundir styrkja teljast ekki til skattskyldra tekna en það heyrir til undantekninga.
Bifreiðakaupastyrkir sem Tryggingastofnun greiðir elli- og örorkulífeyrisþegum, örorkustyrkþegum og umönnunargreiðsluþegum eru ekki skattskyldar tekjur, heldur færast til lækkunar á stofnverði bifreiðarinnar á framtali.
Styrkir sem greiddir eru til jöfnunar á námskostnaði (jöfnunarstyrkir) teljast almennt ekki til skattskyldra tekna.
Samskotafé, sem safnað er af einstaklingum eða félagasamtökum til stuðnings við tiltekinn einstakling eða fjölskyldu, telst ekki til skattskyldra tekna. Þetta á við þegar um er að ræða mannúðarsjónarmið, til dæmis vegna veikinda, slysa eða annarra óvæntra aðstæðna.
Styrkir sem greiddir eru vegna endurhæfingar fatlaðra teljast ekki til skattskyldra tekna, að því gefnu að þeir séu ætlaðir til að mæta útgjöldum vegna meðferðar, þjálfunar eða annarra úrræða sem stuðla að endurhæfingu eða aukinni færni.
Styrkir sem greiddir eru af félagasamtökunum Umhyggju til foreldra og aðstandenda barna með fötlun eða langvinn veikindi teljast ekki til skattskyldra tekna. Styrkirnir eru almennt ætlaðir til að mæta auknum útgjöldum sem falla til vegna aðstæðna barns.
Styrkir sem ríki eða sveitarfélög greiða til tækjakaupa fyrir fatlaða teljast ekki skattskyldir. Þetta á einungis við um styrki sem greiddir eru samkvæmt lögum og reglum um aðstoð við fatlaða, en ekki almennt um styrki til eignakaupa.
Styrkir úr húsafriðunarsjóði eru undanþegnir tekjuskatti. Fjárhæð styrks er færð til lækkunar á stofnverði viðkomandi eignar.
