Viðurkenningarnar voru veittar á ráðstefnu Jafnvægisisvogarinnar, hreyfiaflsverkefnis félags kvenna í atvinnulífinu, sem bar yfirskriftina Jafnrétti er ákvörðun og var sýnd í beinni útsendingu á RÚV.

Markmið Jafnvægisvogarinnar er að árið 2027 verði hlutfallið á milli kynja 40/60 í framkvæmdastjórnum fyrirtækja á Íslandi.

Þátttakendur í Jafnvægisvoginni eru í dag 209 talsins. Þeir hafa allir undirritað viljayfirlýsingu þess efnis að vinna að fyrrnefndu markmiði Jafnvægisvogarinnar, eða að viðhalda jafnvægi ef því hefur þegar verið náð. Stór hluti þeirra þátttakenda sem hafa skrifað undir viljayfirlýsinguna hafa náð góðum árangri á þessu sviði og fjölgaði þeim sem hafa náð markmiðinu um 23 á milli ára. Vinnueftirlitið er þar á meðal.

„Við erum gríðarlega stolt af því að taka þátt í þessari jákvæðu þróun en rannsóknir sýna að fjölbreyttur mannauður hefur jákvæð áhrif á árangur vinnustaða, stuðlar að betri ákvarðanatöku og aukinni starfsánægju,“ segir Hanna Sigríður Gunnsteinsdóttir,“ forstjóri Vinnueftirlitsins.