Í dag er haldið upp á Alþjóðlega netöryggisdaginn í 23. skiptið í yfir 160 löndum. Árlegt yfirþema dagsins er „Saman í þágu betra internets“ en þema ársins 2026 er „Snjöll tækni, öruggar ákvarðanir – örugg og ábyrg notkun gerivgreindar“ og munu þjóðir heimsins standa fyrir fjölbreyttri dagskrá.

Á Íslandi er dagurinn skipulagður af Netvís, miðstöð um félagslegt netöryggi og miðlalæsi, sem heyrir undir Fjölmiðlanefnd. Netvís hefur það hlutverk að styðja við stefnu Evrópusambandsins, Better Internet for Kids.

Í tilefni dagsins stóð Netvís fyrir opnum foreldrafundi á netinu, milli kl. 12-13, og þá fer fram málþing í Hátíðarsal Háskóla Íslands kl. 15:00 undir yfirskriftinni Samfélagsmiðla- og snjallsímanotkun barna og ungmenna.

Persónuvernd vill einnig benda á nýútgefið fræðsluefni Netvís sem heitir Verkfærakista foreldra þar sem hægt er að finna samantektir um samfélagsmiðla, fjölskyldustillingar, öryggi og tilkynningaleiðir. Frekari upplýsingar um netöryggisdaginn er að finna á saferinternetday.org.