Persónuvernd hefur tekið ákvörðun um hvort lögð skuli á sekt vegna gagnagrunns með skattskrárupplýsingum . Hinn 28. nóvember 2018 hafði stofnunin tekið ákvörðun þess efnis að gagnagrunnurinn samrýmdist ekki lögum og að honum skyldi því eytt. Jafnframt var tilkynnt að til skoðunar væri hvort leggja skyldi á sekt. Í ákvörðuninni, sem nú hefur verið tekin, er vísað til þess að kröfur til heimilda til álagningar stjórnvaldssekta eru strangari en til heimilda til útgáfu fyrirmæla eins og um ræddi í fyrri ákvörðun. Þá er vísað til þess vafa sem uppi var um inntak 2. mgr. 98. gr. laga nr. 90/2003 um tekjuskatt fram að töku ákvörðunarinnar hinn 28. nóvember 2018. Er komist að þeirri niðurstöðu að eins og málið sé vaxið, og þegar litið sé til þessa vafa, séu ekki forsendur fyrir beitingu sektarheimildar stofnunarinnar.