Kynbundið ofbeldi er hvers kyns ofbeldi sem byggir á ójafnvægi milli kynja eða skaðlegum hugmyndum um kynhlutverk. Það getur komið fram á marga vegu, t.d.:

• Líkamlegt ofbeldi

  – svo sem barsmíðar eða árásir

• Andlegt eða tilfinningalegt ofbeldi

  – niðurlæging, stjórnsemi, hótanir

• Kynferðislegt ofbeldi

  – nauðgun, brot á kynfrelsi, óvelkomnar kynferðislegar athafnir

• Efnahagslegt ofbeldi

  – stjórn á fjármálum, hindra aðgang að peningum eða vinnu

• Stafrænt ofbeldi

  – svo sem hótanir, áreitni eða dreifing myndefnis án samþykkis

Ofbeldið felst oft í því að gerandinn reynir að stjórna eða brjóta niður hinn aðilann.
Það tengist gjarnan mismunun, fordómum og skaðlegum kynstaðalmyndum.

Kynbundið ofbeldi er algengt vandamál um allan heim. Það birtist á marga vegu og getur haft alvarlegar afleiðingar fyrir einstaklinga, fjölskyldur og samfélagið. Afleiðingarnar geta verið líkamlegar, andlegar eða efnahagslegar og haft áhrif á líf fólks til lengri tíma.

Jafnréttisstofa gegnir mikilvægu hlutverki í að koma í veg fyrir kynbundið ofbeldi, kynbundna áreitni og kynferðislega áreitni. Stofan vinnur að því í samstarfi við stjórnvöld og samtök sem sérhæfa sig í forvörnum.

Aðstoð og úrræði

Margir aðilar veita aðstoð bæði til þolenda og gerenda kynbundins ofbeldis. Aðstæður fólks eru mismunandi, og því er mikilvægt að kynna sér þau úrræði sem í boði eru til að fá þann stuðning sem hentar hverju sinni.

Upplýsingar um aðstoð og úrræði er hægt að nálgast á heimasíðu Neyðarlínunnar.