Nýsköpunardagur hins opinbera (NHO) er árlegur viðburður fyrir opinbera stjórnendur sem brenna fyrir umbreytingu og framþróun í opinberum rekstri og þjónustu við almenning og fyrirtæki í landinu.

Viðburðurinn byggir á þeirri hugsun að nýsköpun í ríkisrekstri sé ekki tímabundið átaksverkefni heldur stöðugt forgangsverkefni stjórnenda sem tryggir stöðugar framfarir. Sjónum er beint að því hvernig stofnanir geta nýtt tækni, gögn, mælingar og samvinnu til að veita notendamiðaða, skilvirka og hagkvæma þjónustu.

Ár hvert sameinar dagskrá NHO erindi, reynslumiðlun og samtöl um árangursríkar aðferðir opinberrar nýsköpunar. Að auki eru Nýsköpunarverðlaun hins opinbera veitt í lok dagsins til heiðurs þeim sem hafa staðið sig sérstaklega vel í að þróa og innleiða nýsköpun í opinberri starfsemi.