Flensur og aðrar pestir - 4. vika 2018

Staðfest inflúensa á veirufræðideild Landspítala í 4. viku 2018.
Í síðustu viku (4. viku) greindist 41 einstaklingur með inflúensu sem er aukning borið saman við vikuna á undan. Mesta aukningin var af inflúensu B, en hún var staðfest hjá 29 einstaklingum. Tólf einstaklingar greindust með inflúensu A, þar af voru sex einstaklingar með inflúensu A(H1)pdm09 og aðrir sex með inflúensu A(H3), sjá upplýsingar á vef veirufræðideildar Landspítala. Hátt hlutfall inflúensu B greininga er í samræmi við stöðuna í mörgum löndum Evrópu þar sem inflúensa B hefur verið algengasta greiningin. Hlutfall ráðandi inflúensustofna er þó nokkuð breytileg eftir löndum. Inflúensan í 4. viku var staðfest hjá fólki á öllum aldri, meðalaldur var 49 ára (0–87 ára) og 15 af 41 var 65 ára eða eldri.

Inflúensan í heilsugæslu og á bráðamóttökum.
Í síðustu viku (4. viku) fjölgaði þeim hratt sem fengu greininguna inflúensulík einkenni í heilsugæslunni og bráðamóttökum.

Staðan á meginlandi Evrópu.
Inflúensan var útbreidd í Evrópu í 3. viku, og fór vaxandi víða, einkum í Austur-Evrópu. Hægt er að sjá nánari upplýsingar á inflúensuvef Sóttvarnastofnunar Evrópusambandsins (ECDC) og Alþjóðaheilbrigðismálastofnunarinnar (WHO). Bæði inflúensa A og B breiðist út. Í upphafi inflúensutímabilsins var inflúensa B ráðandi en í 3. viku var hlutfall þessara veirustofna nokkuð breytilegt eftir löndum og vöktunarkerfum.

Innlagnir vegna inflúensu á Landspítala.
Samkvæmt upplýsingum frá sýkingavarnadeild Landspítala, fjölgaði að nýju inniliggjandi sjúklingum með inflúensu í 4. viku borið saman við vikuna þar á undan. Mynd 2 sýnir aldursdreifingu þeirra sem hafa legið á Landspítala með inflúensu frá því í 37. viku 2017. Flestir sem leggjast inn vegna inflúensu eru einstaklingar með undirliggjandi sjúkóma eða aldraðir.

RSV og aðrar öndunarfæraveirur.
Enn greinast margir með staðfesta Respiratory Syncytial veirusýkingu (RSV). Í 4. viku var veiran staðfest hjá 20 einstaklingum, eins og sjá má á vef veirufræðideildar Landspítala. Þar af voru tíu börn á fyrsta og öðru aldursári og fimm einstaklingar voru 65 ára og eldri. Aldraðir og ungabörn eru þekktir áhættuhópar en veiran hefur einnig verið staðfest hjá fólki á öðrum aldri.Í síðustu viku var human metapneumóveira staðfest hjá sex einstaklingum en sl. fimm vikur hefur sú veira verið staðfest hjá 22 einstaklingum. Þar af greindist veiran bara hjá 3 börnum (0–3ja ára) en 14 af 22 voru 65 ára eða eldri.

Samantekt og mat á öndunarfæraveirum síðastliðnar vikur.
Inflúensa B breiðist nú hratt út í samfélaginu og er hún oftast staðfest hjá fullorðnum og öldruðum. Mikið álag er á Landspítala, en þeir sem leggjast inn með inflúensu eru aðallega einstaklingar með undirliggjandi sjúkdóma eða aldraðir. RSV-veiran er einnig í útbreiðslu og greinist oftast hjá ungum börnum og öldruðum einstaklingum, en einnig er nokkuð um metapneumóveirusýkingar sem hafa verið algengastar meðal aldraðra.

Meltingarfærasýkingar.
Fjöldi tilkynninga um niðurgang frá heilsugæslunni og bráðamóttökum er nú meiri en gera má ráð fyrir á þessum árstíma, sjá mynd 3 og við nánari greiningu sést að aukningin er aðallega hjá börnum á aldrinum 0–4 ára. Á síðastliðnum vikum hefur töluvert greinst af rótaveiru, sjá nánar á vef veirufræðideildar Landspítala. Allir 19, sem greindust með staðfesta rótaveiru fyrstu fjórar vikur ársins, voru frá 0–4 ára og meðalaldur þeirra var 1 árs. Það er því hugsanlegt að rótaveira í samfélaginu skýri að einhverju leyti óvænta aukningu í síðustu viku. Nokkrir voru með staðfesta nóró- eða sapóveirusýkingu, flestir þeirra voru á barnsaldri.

Sóttvarnalæknir