Endurveiting ökuréttar eftir sviptingu

Ökuskírteini kostar 8.600 krónur.

Bráðabirgðaskírteini til þriggja ára kostar 4.300 krónur.

Athugið: Heimilt er að sækja um endurveitingu allt að einum mánuði áður en sviptingartímanum lýkur. Ökuréttindi fást þó ekki endurútgefin fyrr en að lokinni sviptingu.

Svipting á bráðabirgðaskírteini

Einstaklingur með bráðabirgðaskírteini sem missir bílprófið, þarf að fara á sérstakt námskeið og standast bóklegt og verklegt próf til að fá ökuskírteinið aftur. Sé svipting lengri en 12 mánuðir, skal skila inn læknisvottorði vegna ökuleyfis þegar sótt er um.

Svipting á fullnaðarskírteini

Svipting í minna en 12 mánuði:

Við sviptingu í minna en 12 mánuði má sækja ökuskírteinið til sýslumanns að sviptingartímanum liðnum og fá þannig ökuréttindin aftur.

Svipting í meira en 12 mánuði:

Missir þú bílprófið í meira en 12 mánuði, þarf að fara á sérstakt námskeið (Ef svipting er eftir árið 2020) og standast bóklegt og verklegt próf til að fá ökuskírteinið aftur. Einnig þarf að skila inn læknisvottorði vegna ökuleyfis þegar sótt er um endurveitingu.

Svipting meira en þrjú ár, minna en ævilangt

Ef svipting varir lengur en þrjú ár en minna en ævilangt, er umsækjanda heimilt að sækja um náðun hjá Lögreglu eða Sýslumanni þegar þrjú ár eru liðin frá upphafi sviptingar. Að fenginni náðun, má sækja um endurveitingu ökuréttinda hjá Sýslumanni.

Ævilöng svipting

Ef ökuréttindum hefur verið svipt ævilangt, er hægt að sækja um náðun hjá Lögreglu eða Sýslumanni þegar fimm ár eru liðin frá upphafi sviptingar. Veiti lögregla náðun, má sækja um endurveitingu ökuréttinda hjá Sýslumanni.

Afturköllun ökuréttinda

Lögreglustjóri getur afturkallað ökuréttindi ef skilyrðum til að halda þeim er ekki lengur fullnægt.

Þegar ökuréttindi eru afturkölluð er ökuskírteinið afhent lögreglu.

Afturköllun ökuréttinda af heilsufarsástæðum

Ef ökuréttindi eru afturkölluð vegna heilsufarsástæðna, þarf að sækja um endurveitingu ökuréttinda hjá Sýslumanni. Fylgja þarf umsókn læknisvottorði þar sem staðfest er að breytingar hafi átt sér stað á heilsufari umsækjanda og læknir telji viðkomandi hæfan til að hafa ökuréttindi.

Sýslumaður metur vottorðið og veitir eftir atvikum heimild til að taka endurveitingu til að fá ökuréttindi á ný.