Dvalarleyfi fyrir námsmenn

Skila þarf inn greiðslukvittun, ef greitt er fyrir umsókn með millifærslu í banka.

Á greiðslukvittun þurfa þessar upplýsingar að koma fram:

• nafn greiðanda

• fæðingardagur / kennitala greiðanda

• viðtakandi greiðslu

• skýring: nafn og fæðingardagur umsækjanda

• upphæð og

• dagsetning greiðslu.

Passamynd skal vera af stærðinni 35x45 mm.

Gildistími vegabréfs skal vera minnst 90 dagar umfram gildistíma dvalarleyfis sem sótt er um.

Ljósrit þarf að vera af:

• síðu með persónuupplýsingum

• síðu með undirskrift umsækjanda

Athugið að tölvulæsilegar öryggisrendur þurfa að vera vel sýnilegar á afritinu. Æskilegt er að afritið sé í lit.

Sakavottorð

• þarf ekki að vera lögformlega staðfest,

• þarf að vera gefið út af búseturíki umsækjanda,

• má ekki vera eldra en 12 mánaða þegar það er lagt fram, og

• skal gefið út af æðsta yfirvaldi sem heimilt er að gefa út slíkt vottorð í viðkomandi ríki.

Komi fram dómur á sakavottorði, þarf einnig að leggja fram staðfest gögn frá yfirvöldum um hvort og hvenær umsækjandi hafi lokið afplánun.

Ef vottorðið er á öðru tungumáli en ensku eða Norðurlandamáli þarf einnig að leggja fram þýðingu þess, sjá kröfur til skjalaþýðinga neðst á síðunni.

Ef ástæða er til getur Útlendingastofnun óskað eftir lögformlega staðfestu frumriti sakavottorðs eða að lögð séu fram sakavottorð frá fleiri ríkjum en búseturíki.

Ef umsækjandi er nú þegar með dvalarleyfi á Íslandi, mun Útlendingastofnun afla íslensks sakavottorðs.

Ólíkar reglur eftir löndum

Mismunandi reglur geta gilt um útgáfu sakavottorða eftir löndum. Vottorðið þarf að sýna að leitað hafi verið í gagnagrunnum alls landsins en ekki einungis á ákveðnum svæðum (til dæmis ríkjum eða fylkjum).

Dæmi um réttmætan útgefanda:

• Bandaríkin – FBI sakavottorð
  Það eru tvær leiðir til að nálgast FBI sakavottorð. Annars vegar með því að póstleggja beiðni til FBI og fá útgefið sakavottorð sent til umsækjanda í bréfpósti og hins vegar með því að sækja um rafrænt sakavottorð beint frá FBI eða hjá sérstökum veitum sem samþykktar hafa verið af FBI. Það tekur styttri tíma að fá sakavottorð útgefið rafrænt með aðstoð slíkra veitna.
  Á heimasíðu FBI hefur verið tekinn saman listi yfir þær veitur sem samþykktar hafa verið af FBI. Hafa þarf í huga að vottorð frá sumum veitum er ekki hægt að opna utan Bandaríkjanna og því ekki hægt að nota þjónustu þeirra til að skila sakavottorði til Útlendingastofnunar.

  Í báðum tilfellum þarf umsækjandi að láta taka af sér fingraför og senda þau með beiðni um sakavottorð. Hér á landi eru fingraför tekin af umsækjanda hjá tæknideild lögreglunnar á höfuðborgarsvæðinu.

• Kanada – RCMP sakavottorð byggt á fingraförum

• Filippseyjar – NBI sakavottorð

• Taíland – Royal Thai Police

• Brasilía – Certidão de Antecedentes Criminais, útgefið af Brazilian Federal Police

• Mexíkó – SEGURIDAD - (Secretaría De Seguridad Y Protección Ciudadana)

• Bretland – ACRO sakavottorð (ACRO Criminal Records Office - Police Certificates)

Athugið að oft tekur nokkurn tíma að fá útgefið sakavottorð og viðeigandi staðfestingu. 

Leggja þarf fram staðfestingu á því að umsækjandi hafi keypt sjúkratryggingu þar sem fram kemur að tryggingin

• gildi á Íslandi,

• í minnst þrjá mánuði frá skráningu lögheimilis umsækjanda á Íslandi,

• að lágmarksupphæð 2.000.000 kr.

Mikilvægt er að kynna sér vel skilmála sjúkratryggingar áður en hún er keypt. Tryggingavernd getur verið mismunandi og nær til dæmis almennt ekki til heilbrigðisþjónustu í tengslum við meðgöngu og barnsfæðingu.

Á vef Fjármálaeftirlitsins má finna lista yfir íslensk tryggingafélög (undir liðnum Vátryggingafélög).

Gildistími
Gildistími tryggingarinnar þarf að vera minnst þrír mánuðir frá skráningu lögheimilis í þjóðskrá. Skráning í þjóðskrá miðast að öllu jöfnu við þann dag sem umsækjandi kemur til myndatöku hjá Útlendingastofnun eða sýslumanni vegna útgáfu dvalarleyfiskorts, hafi hann dvalið hér á landi samfellt frá því að myndatakan fór fram.

Sé ljóst að breyta þurfi gildistíma íslenskrar tryggingar, til dæmis vegna þess að umsækjandi er ekki kominn til landsins og vinnslutími umsóknar er lengri en áætlað var, þarf umsækjandi að hafa samband við tryggingafélagið vegna þessa.

Þegar þrír mánuðir eru liðnir frá lögheimilisskráningu hefur umsækjandi áunnið sér rétt til að vera sjúkratryggður hér á landi samkvæmt almannatryggingakerfi Íslands. 

Gögn sem sýna fram á trygga framfærslu skulu

• lögð fram í frumriti

• staðfest af atvinnurekanda eða þeirri stofnun sem er útgefandi þeirra

Trygg framfærsla getur stuðst við fleiri en einn þátt, til dæmis bæði launatekjur og eigið fé eins og bankareikninga.

Námsstyrkur eða námslán
Hafi umsækjandi fengið styrk til náms eða námslán teljast þær greiðslur til tryggrar framfærslu nái þær þeirri lágmarksupphæð sem krafist er. Námslán eða námsstyrkur þarf að vera í gjaldmiðli sem er alþjóðlega viðurkenndur og hægt að skipta í mynt sem er skráð hjá Seðlabanka Íslands. Leggja þarf fram staðfestingu á lánagreiðslum frá viðeigandi lánastofnun og staðfestingu á styrk frá styrkveitanda eftir því sem við á.

Nægilegt eigið fé til framfærslu
Bankayfirlit sem sýnir fjárhæð inneignar á bankareikningi umsækjanda, hérlendis eða erlendis. Fjárhæðin þarfa að vera í gjaldmiðli sem er alþjóðlega viðurkenndur og hægt að skipta í mynt sem er skráð hjá Seðlabanka Íslands og hægt er að taka út og nýta til framfærslu. Yfirlitið þarf að vera staðfest af bankanum sjálfum og í frumriti. Útprentun reikningsyfirlits úr heimabanka er ekki fullnægjandi staðfesting. Upplýsingar um skráningu gjaldmiðla er að finna hjá Seðlabanka Íslands. Ef umsækjandi er á framfæri maka sem búsettur er á Íslandi er heimilt að leggja fram staðfest bankayfirlit frá maka.

Ráðningarsamningur eða tekjur af sjálfstæðri atvinnustarfsemi
Ef umsækjandi stundar atvinnu á Íslandi getur hann sýnt fram á trygga framfærslu með því að leggja fram ráðningarsamning í frumriti. Ef umsækjandi er á framfæri maka sem búsettur er á Íslandi er heimilt að leggja fram ráðningarsamning viðkomandi. Það athugist að heimild erlends ríkisborgara til að framfleyta öðrum á grundvelli sjálfstæðrar atvinnustarfsemi er takmörkuð. Samkvæmt lögum um atvinnuréttindi útlendinga nr. 97/2002 getur eingöngu útlendingur sem er undanþeginn kröfu um atvinnuleyfi stundað sjálfstæða atvinnustarfsemi sem og maki íslensks ríkisborgara.

Launaseðlar síðustu þriggja mánaða og staðgreiðsluyfirlit launa
Umsækjandi getur sýnt fram á launatekjur með því að leggja fram staðgreiðsluyfirlit eða útgefna reikninga stimplaða af skattyfirvöldum auk launaseðla síðustu þriggja mánaða. Launaseðlar, útprentun úr heimabanka er fullnægjandi ella þarf staðfestingu launagreiðanda. Ef umsækjandi er á framfæri maka sem búsettur er á Íslandi er heimilt að leggja fram launaseðla maka fyrir síðustu þrjá mánuði sem og staðgreiðsluyfirlit maka.

Tryggar reglulegar greiðslur til framfærslu
Slíkar greiðslur geta verið greiðslur frá Tryggingastofnun vegna örorku, atvinnuleysisbætur, leigutekjur og styrkir sem umsækjandi fær til dæmis vegna rannsókna. Ekki er um tæmandi upptalningu að ræða á þeim greiðslum sem hér geta átt við.

Almennir námsmenn

Þegar sótt er um í fyrsta sinn þurfa almennir námsmenn að leggja fram staðfestingarbréf frá háskólanum þar sem þeir hafa fengið inngöngu. Í bréfinu þarf að koma fram að umsækjandi sé skráð/skráður í fullt nám næsta skólaár og að skólavist sé óskilyrt. Ekki er nægjanlegt að leggja fram staðfestingu á skráningu sem er bundin fyrirvara um að umsækjandi ljúki öðru námi. Fullt nám er 30 ECTS á önn.

Doktorsnemar við erlenda háskóla í samstarfi við íslenskan háskóla

Þurfa að leggja fram staðfestingu á samstarfi erlenda háskólans við íslenskan háskóla, þar sem fram kemur í hverju samstarfið felst.

Skiptinemar

Þurfa að leggja fram

• Staðfestingu frá íslenskum framhaldsskóla.

• Skriflegt samþykki fósturfjölskyldu á Íslandi.

Ef umsækjandi um dvalarleyfi sem skiptinemi er yngri en 18 ára þarf einnig að leggja fram.

• Staðfest fæðingarvottorð umsækjanda.

• Skriflegt samþykki foreldra / forsjármanna og afrit af vegabréfi þeirra.

Starfsnemar

Þurfa að leggja fram

• Staðfestingu á innritun í háskóla þar sem fram kemur að starf á Íslandi sé hluti námsins.

• Greinargerð þar sem starfsnámi er lýst.

• Umsókn um tímabundið atvinnuleyfi vegna náms.

  • í frumriti

  • staðfest af viðeigandi stéttarfélagi

  • undirrituð af umsækjanda og vinnuveitanda.

• Ráðningarsamningur við íslenskt fyrirtæki

  • í frumriti

  • með upplýsingum um launakjör umsækjanda en þau verða að ná viðmiði um lágmarkslaun

  • undirritaður af umsækjanda og vinnuveitanda.

Útlendingastofnun áframsendir umsókn um atvinnuleyfi og ráðningarsamning til Vinnumálastofnunar til afgreiðslu.

Iðnnemar og starfsnemar á framhaldsskólastigi

Þurfa að leggja fram

• Staðfestingu íslensks skóla á innritun í fullt nám samkvæmt námskrá skólans.

Ef þú vilt að einhver annar en þú fái upplýsingar um vinnslu umsóknarinnar hjá Útlendingastofnun þarftu að skila inn umboði þess efnis.