Dvalarleyfi fyrir au pair

• Dvalarleyfi fyrir au pair er veitt í jafnlangan tíma og samningur um vistráðningu kveður á um en þó aldrei lengur en í eitt ár.

• Dveljist handhafi leyfisins lengur en þrjá mánuði samfellt erlendis getur dvalarleyfið verið fellt niður. Dvalarleyfi útlendings fellur sjálfkrafa niður þegar lögheimili hans, sem skráð var hér á landi, hefur verið skráð erlendis í þrjá mánuði.

Réttur til að skipta um vistfjölskyldu

• Ef vistráðningarsamningi er sagt upp, þarf að tilkynna Útlendingastofnun um það á þar til gerðu eyðublaði.

• Au pair getur gert nýjan vistráðningarsamning við aðra vistfjölskyldu. Nýja samninginn þarf að leggja fram hjá Útlendingastofnun ásamt framfærslugögnum frá nýju vistfjölskyldunni.

• Ef minna en þrír mánuðir eru eftir af gildistíma dvalarleyfis er rétt að sækja heldur um endurnýjun leyfisins.

Réttur til endurnýjunar leyfis

• Dvalarleyfið má endurnýja einu sinni til eins árs en þó ekki lengur en samningur um vistráðningu gerir ráð fyrir.

• Með umsókn um endurnýjun þarf að leggja fram nýjan vistráðningarsamning ásamt framfærslugögnum frá vistfjölskyldu.

• Þrátt fyrir að dvalarleyfi hafi fallið niður er hægt að sækja um endurnýjun á dvalarleyfi, ef það er gert innan gildistíma fyrra dvalarleyfis og sanngirnisástæður mæla með því.

Réttur til fjölskyldusameiningar

• Dvalarleyfið veitir ekki rétt til fjölskyldusameiningar.

Réttur til að vinna

• Dvalarleyfið veitir ekki rétt til að vinna á Íslandi, hvorki launað starf né ólaunað.

Réttur til ótímabundins dvalarleyfis

• Dvalarleyfið getur ekki verið grundvöllur ótímabundins dvalarleyfis.

Réttur til að sækja aftur um dvalarleyfi á Íslandi

• Au pair getur ekki sótt um dvalarleyfi vegna atvinnuþátttöku á Íslandi fyrr en eftir tveggja ára samfellda dvöl erlendis frá lokum gildistíma au pair leyfisins.