Barnabætur

Barnabætur eru greiddar til foreldra (framfærenda) með hverju barni til 18 ára aldurs.

Þær eru tekjutengdar og eru reiknaðar út frá tekjum á skattframtali. Þar með talið eru fjármagnstekjur og erlendar tekjur.

Rétt til barnabóta á Íslandi eiga þau sem hafa börn á framfæri sínu og dvelja hér meirihluta árs. Börn þurfa að vera skráð til heimilis hjá framfæranda í lok árs.

Greiðslur

Barnabætur eru greiddar út fjórum sinnum á ári:

• 1. febrúar – fyrirframgreiðsla

• 1. maí – fyrirframgreiðsla

• 1. júní – ákvarðaðar barnabætur

• 1. október – ákvarðaðar barnabætur

Fyrstu tvær greiðslur ársins eru byggðar á áætlun, en eftir álagningu (úrvinnslu skattframtals) eru eftirstöðvar af reiknuðum barnabótum greiddar út í tveimur greiðslum.

Hægt er að óska eftir leiðréttingu á forsendum ef aðstæður einstaklings hafa breyst.

Aldur barns

Með börnum yngri en sjö ára á tekjuárinu eru aukalega greiddar sérstakar barnabætur, sem einnig eru tekjutengdar.

Barnabætur eru fyrst reiknaðar í álagningu skatta árið eftir að barn fæðist, en á fæðingarári er hluti þeirra barnabóta greiddur fyrir fram (byggt á áætlun). Sjá nánar um barnabætur á fæðingarári.

Barnabætur eru reiknaðar í síðasta skipti árið sem barn nær 18 ára aldri.

Skilyrði og útreikningar

Rétt til barnabóta á Íslandi eiga þau sem hafa á framfæri sínu börn og eru heimilisföst/búsett hér eða dvelja hér á landi lengur en samtals 183 daga á 12 mánaða tímabili. Undantekningar frá þessu geta átt við um börn búsett utan Íslands en innan Evrópska efnahagssvæðisins (EES).

Eingöngu framfærendur barna eiga rétt á greiðslu barnabóta:

• Barn þarf að vera skráð í þjóðskrá á sama heimili og framfærandi í árslok (eða samningur að liggja fyrir hjá sýslumanni um skipta búsetu barns).

• Ekki skiptir máli þótt barnið hafi ekki verið á framfæri sama einstaklings allt árið.

• Þau sem greiða meðlag með barni teljast ekki framfærandi í þessu sambandi.

Tekjutenging

Barnabætur eru tekjutengdar og reiknaðar út frá tekjum á skattframtali. Sjá nánar um fjárhæðir barnabóta.

Fjármagnstekjur og tekjur erlendis hafa áhrif á útreikning barnabóta. Það á einnig við um laun frá alþjóðastofnunum sem ekki eru skattlögð.

Þú getur séð forsendur fyrir þínum útreikningi barnabóta á þjónustuvef Skattsins undir flipanum „Samskipti“.

Reiknivél barnabóta á vef Skattsins

Fjölskylduaðstæður

Miðað er við fjölskyldustöðu eins og hún er skráð í þjóðskrá 31. desember árið á undan.

Barnabætur skiptast jafnt á milli hjóna. Miðað er við samanlagðar tekjur samkvæmt skattframtölum beggja.

Sama gildir um:

• Sambúðarfólk sem uppfyllir skilyrði fyrir samsköttun í lok tekjuársins.

• Þau sem halda heimili saman ásamt barni sínu, þótt skilyrði til skráningar á sambúð séu ekki uppfyllt.

Foreldrar barna með skipta búsetu

Foreldrar sem semja um skipta búsetu barna hjá sýslumanni geta hvort um sig átt rétt á barnabótum.

Barnabæturnar reiknast sjálfkrafa til beggja foreldra svo lengi sem samningur um skipta búsetu barns liggur fyrir hjá sýslumanni í árslok. Ekki þarf að sækja um barnabæturnar til Skattsins.

Barnabæturnar vegna barna með skipta búsetu eru reiknaðar fyrir hvort foreldri fyrir sig, miðað við tekjur og fjölskyldustöðu.

Mismunur getur verið á fjárhæð barnabóta milli foreldra með sama barni, jafnvel þannig að annað fái barnabætur en hitt engar.

Samningur um skipta búsetu barns fellur úr gildi við flutning annars foreldris úr landi.

Fyrirframgreiðsla

Endanlegur útreikningur barnabóta liggur ekki fyrir fyrr en við álagningu í lok maí, þegar unnið hefur verið úr skattframtali. Fyrstu tvær greiðslur ársins byggja því á áætlun og teljast fyrirframgreiðsla.

Áætlunin byggir á staðgreiðslu af tekjum og upplýsingum um tekjur utan staðgreiðslu frá skattframtali fyrra árs. Viðmiðunartímabil tekna í staðgreiðslu er frá nóvember til nóvember.

Sem dæmi gildir um barnabætur greiddar 2027:

• Endanleg upphæð bóta miðast við tekjuárið 2026.

• Fjöldi barna miðast við fjölskyldustöðu 31. desember 2026.

• Fyrstu tvær greiðslur ársins (fyrirframgreiðsla) byggja á fyrirliggjandi upplýsingum um tekjur (frá nóvember 2025 til nóvember 2026) og upplýsingum úr skattframtali fyrir árið 2025.

• Þegar unnið hefur verið úr skattframtali fyrir árið 2026 er nákvæm upphæð reiknuð út og hún ræður tveimur seinni greiðslum ársins.

Fyrirframgreiðsla fellur niður ef nægar upplýsingar liggja ekki fyrir til að ákvarða barnabætur, til dæmis ef skattframtali hefur ekki verið skilað árið áður. Í slíkum tilvikum þarf að sækja sérstaklega um að fá fyrirframgreiðslu.

Þegar aðstæður einstaklings eru aðrar en forsendur útreiknings gera ráð fyrir má óska eftir leiðréttingu á fyrirframgreiddum barnabótum.

Sjá nánar um leiðréttingu á forsendum barnabóta

Flutningur milli landa

Þau sem flytja til eða frá landinu á árinu fá barnabætur hlutfallslega miðað við dvalartíma á Íslandi.

Þetta á þó ekki við um námsmenn erlendis sem sækja um að halda skattalegum réttindum á Íslandi. Þau eiga rétt á barnabótum hér á landi að því marki sem þær eru hærri en fengnar barnabætur eða hliðstæðar greiðslur erlendis frá.