Samskipti á stofnunum ríkisins geta verið margskonar. Starfsfólk á í samskiptum hvert við annað, við þau sem leita til stofnunar og eftir atvikum aðra samstarfsaðila.

Góð og jákvæð samskipti

Uppbyggileg og jákvæð samskipti hafa góð áhrif á vinnuanda, líðan og afköst í vinnunni. Aftur á móti geta slæm og neikvæð samskipti valdið vanlíðan starfsfólks og haft slæm áhrif á vinnuanda.

Mikilvægt er að stjórnendur hugi að vinnustaðarmenningu og óskrifuðum reglum í samskiptum. Eftir höfðinu dansa limirnir. Stjórnendur sem leggja sig fram um að byggja upp jákvæða vinnustaðarmenningu sem einkennist af trausti og virðingu eru líklegri til að ná árangri með stofnun sinni.

Á vinnustað getur allt starfsfólk lagt sitt af mörkum til að samskipti séu góð. Hver og einn getur tileinkað sér jákvæð samskipti. Að sýna gott fordæmi, vera til staðar fyrir samstarfsfólk þegar á þarf að halda og að veita félagslegan stuðning eru dæmi um það sem hver og einn getur gert.

Að fagna ágreiningi

Á vinnustöðum geta verið uppi mismunandi skoðanir og sjónarmið um nálgun, verklag og framkvæmd. Því er eðlilegt að fólk hafi skiptar skoðanir og greini á. Sumir fagna ágreiningi. Með því er átt við að eðlilegur ágreiningur eða skoðanaskipti geta verið skapandi, varpað nýju ljósi á verkefnin og leitt til nýrra lausna. Þó er mikilvægt að til séu leiðir til að vinna úr neikvæðum eða viðvarandi ágreiningi á vinnustað. Skýr stefna, markmiðasetning og boðleiðir fyrirbyggja ágreining.

Stofnanir ríkisins hafa í auknum mæli tekið upp samskiptasáttmála eða samskiptasamninga. Markmiðið er að starfsfólk upplifi vellíðan í vinnu og sálrænt öryggi.

Með samskiptasáttmála er vakin athygli á mikilvægi samskipta og sett viðmið eða leiðbeiningar um góð og uppbyggileg samskipti. Þannig er hægt að koma í veg fyrir misskilning. Einnig getur samskiptasáttmáli auðveldað starfsfólki að ræða um samskipti sín á milli og hvað mætti betur fara í þeim efnum.

Til að samskiptasáttmáli virki sem best er nauðsynlegt að starfsfólk taki þátt í mótun hans og innleiðingu. Í samskiptasáttmála eru oft tekin dæmi um óæskileg eða neikvæð samskipti.

Samskiptasáttmáli getur bæði beinst inn á við og fjallað um samskipti milli starfsfólks en einnig út á við og fjallað um samskipti við viðskiptavini eða þá sem njóta þjónustunnar. Í samskiptasáttmála Landspítalans segir til dæmis að tilgangur hans sé að auka öryggi sjúklinga og bæta líðan starfsfólks.