Umsókn um stuðning við skógrækt félaga og samtaka - Vorviður

Félög sækja um stuðninginn til Lands og skógar sem annast umsýslu þessa verkefnis.

Upplýsingar sem þurfa að fylgja

Á rafrænu eyðublaði þarf að útfylla eftirfarandi:

• Nafn og kennitala, heimilisfang, símanúmer og netfang félags og forsvarsmanns eða tengiliðar.

• Ræktunarsvæði, staðsetning og landgerð (lýsing ásamt mynd eða korti).

• Skipulagsleg staða landsins og verndarákvæði ef einhver eru.

• Leyfi landeiganda (afrit af samningi/samkomulagi).

• Áætlað umfang, landstærð, fjöldi plantna og plöntutegundir og kostnaðaráætlun.

Forsendur styrkveitingar

Umsóknarfrestur er tilgreindur í auglýsingu hverju sinni og fyrir tiltekinn dag tilkynnir verkefnisstjóri umsækjendum um úthlutun vegna viðkomandi árs.

Félag sem hlýtur styrk gerir samning við Land og skóg fyrir eitt ár í senn. Samningi fylgja leiðbeiningar um hvar nálgast má plönturnar. Forsendur eru:

• Að umsækjandi hafi leyfi landeiganda fyrir framkvæmdinni og að hún stangist ekki á við verndarákvæði samkvæmt landslögum eða skipulagsáætlun viðkomandi sveitarfélags.

• Landið sé friðað fyrir beit.

• Gerður verður samningur við styrkþega um viðkomandi skógræktarverkefni. Hann er byggður á upplýsingum umsækjanda, einfaldri ræktunaráætlun og kostnaðaráætlun.

Forgangur að styrkjum

Forgangsröðun mótast einkum af ræktunaröryggi, aðallega hvað varðar beitarfriðun og örugga getu félaga til að koma hlutum í verk.

Land

• Stærri lönd sem eru skipulögð til skógræktar og friðuð fyrir beit eða svæði inn­an slíkra heilda, t.d. svæði innan skógræktarsvæða sveitarfélaga eða annarra aðila.

• Stærri einkalönd sem eru friðuð fyrir beit.

• Minni svæði (minnst 1 hektari) sem eru friðuð fyrir beit.

  • Svæði sem ekki eru friðuð fyrir beit koma ekki til greina.

  • Frístundalóðir koma ekki til greina.

Félög

• Formleg félög sem ekki hafa aðgang að annarri fjármögnun til skógræktar, til dæmis góðgerðarfélög og áhugamannasamtök.

• Óformleg félög sem ekki hafa aðgang að annarri fjármögnun til skógræktar, til dæmis vinnustaða­félög.

• Félög sem hafa aðgang að annarri fjármögnun til skógræktar, til dæmis skógræktar­félög.

  • Fyrirtæki og opinberar stofnanir eða félög (hf., ehf., sf., ohf.) koma ekki til greina.

Kröfur til styrkþega

• Fyrir 15. október skulu styrkþegar hafa skilað framkvæmdaskýrslu á þar til gerðu eyðu­blaði ásamt útlínum hins nýja skógar, hnituðum með sérstöku appi eða teiknuðum á loftmynd.

• Bökkum undan skógarplöntum ber að skila til baka á afhendingarstað sem fyrst eftir gróðursetningu.