Teymisstjóri á leyfasviði

Útlendingastofnun leitar að teymisstjóra til að leiða málsmeðferðarteymi á leyfasviði stofnunarinnar. Leyfasvið hefur það hlutverk að afgreiða umsóknir um dvalarleyfi á Íslandi og íslenskan ríkisborgararétt. Helstu verkefni teymisstjóra á leyfasviði eru dagleg stjórnun teymisins, að tryggja að stjórnsýsluákvarðanir séu faglegar, vandaðar og í samræmi við lög, stuðla að skilvirkri málsmeðferð, hvetja starfsfólk til umbóta og efla góðan liðsanda.

Teymisstjóri á leyfasviði þarf að búa yfir leiðtogahæfni, frumkvæði og metnaði til að ná árangri í starfi. Teymisstjóri heyrir undir sviðsstjóra leyfasviðs Útlendingastofnunar.

Útlendingastofnun er vinnustaður þar sem lögð er áhersla á stafræna þróun og umbætur. Hjá stofnuninni starfar samhentur hópur rúmlega 100 starfsmanna á fjórum sviðum. Umfangsmesti þátturinn í starfsemi stofnunarinnar er útgáfa dvalarleyfa. Útlendingastofnun afgreiðir umsóknir um dvalarleyfi, hvort sem um er að ræða dvalarleyfi á grundvelli atvinnuþátttöku, fjölskyldusameiningar, námsvistar eða vistráðningar. Þá afgreiðir stofnunin einnig umsóknir um ríkisborgararétt og umsóknir um alþjóðlega vernd. Lögð er rík áhersla á að vinnustaðurinn sé fjölskylduvænn og að starfsandi sé til fyrirmyndar. Boðið er upp á góða vinnuaðstöðu, sveigjanlegan vinnutíma og kost á fjarvinnu. Stofnunin hefur undanfarin ár tekið þátt í verkefninu um styttingu vinnuvikunnar og er miðað við 36 stunda vinnuviku hjá öllu starfsfólki.

• Dagleg stjórnun og skipulag teymisins

• Ráðgefandi hlutverk og stuðningur fyrir starfsfólk teymisins

• Að umsóknir og erindi séu afgreidd á faglegan og skilvirkan hátt í samræmi við lög og reglugerðir

• Að teymið starfi í samræmi við stefnur og markmið stofnunar

• Að verkferlar séu til staðar, þeim fylgt og uppfærðir

• Fræðsla starfsfólks og samstarfsaðila

• Að unnið sé að stöðugum umbótum innan teymissins

• BA gráða í lögfræði ásamt meistaragráðu í lögfræði eða embættispróf í lögfræði

• Farsæl reynsla af stjórnun með mannaforráðum er kostur

• Þekking og reynsla af opinberri stjórnsýslu er kostur

• Þekking og reynsla af útlendingamálum er kostur

• Leiðtogahæfni og framúrskarandi hæfni í mannlegum samskiptum

• Áhugi á stafrænum lausnum

• Skipulagshæfni, sjálfstæði í vinnubrögðum og frumkvæði

• Mjög góð almenn tölvukunnátta

• Gott vald á íslensku og ensku í ræðu og riti

• Kunnátta í einu Norðurlandatungumáli

• Geta til að leiða umbótastarf

Laun samkvæmt gildandi kjarasamningi sem fjármála- og efnahagsráðherra og Stéttarfélag lögfræðinga hafa gert.

Umsókn skal fylgja ferilskrá að hámarki 2 bls. og kynningarbréf sem er að hámarki 1 bls. á íslensku. Umsóknir á erlendum tungumálum, án kynningarbréfa eða án ferilskráa verða ekki teknar til greina. Einnig skal fylgja umsókn staðfesting á prófgráðum. Við ákvörðun um boðun í starfsviðtal verður sérstaklega horft til gæða umsóknargagna.

Við ákvörðun um ráðningu verður, auk framangreindra hæfnisviðmiða, tekið mið af frammistöðu í starfsviðtali og umsagna sem aflað verður. Í einstaka tilfellum leggur stofnunin einnig verkefni fyrir umsækjendur í ráðningarferlinu.

Um er að ræða ótímabundna ráðningu með 6 mánaða reynslutíma. Æskilegt er að umsækjendur geti hafið störf eigi síðar en 1. júlí nk. eða samkvæmt nánara samkomulagi.

Vakin er athygli á því að umsækjendur þurfa að vera reiðubúnir til að framvísa sakavottorði.

Tekið er við umsóknum rafrænt í gegnum vefgátt Starfatorgs.

Áhugasamir eru hvattir til að sækja um starfið, óháð kyni. Umsóknir gilda í sex mánuði frá því að umsóknarfresti lýkur. Öllum umsóknum verður svarað eftir að ákvörðun um ráðningu hefur verið tekin.