Framhaldsskólakennari í líffræði og tengdum greinum við Menntaskólann á Egilsstöðum

Menntaskólinn á Egilsstöðum auglýsir eftir kennara sem getur kennt líffræði og skyldar greinar. Kostur er að viðkomandi geti einnig kennt félagsgreinar. Um er að ræða 100% stöðu við skólann.

Við skólann er lögð áhersla á þróunarstörf í kennsluháttum, námsmati, leiðsagnarnámi og þverfaglegu samstarfi á grundvelli skólanámskrár. Mikil áhersla er lögð á góða þjónustu við nemendur jafnt staðnema og fjarnema. Skipulag skólaársins er með þeim hætti að önnum er skipt í tvær spannir. Skólinn notar kennslukerfið Canvas og námsumsjónarkerfið Innu. Skólinn er skóli án aðgreiningar.

Gildi skólans eru gleði, virðing og jafnrétti. Gildin endurspeglast í starfi skólans og skólabrag. Nýlega hlaut Menntaskólinn á Egilsstöðum nafnbótina Stofnun ársins eftir könnunina Stofnun ársins, sem gefur til kynna góðan starfsanda, samheldinn hóp starfsmanna og gott vinnuumhverfi.

Kennarar annast, taka þátt í og bera ábyrgð á eftirfarandi:

• kennslu (stað og fjarkennsla), undirbúningi kennslu, námsmati og faglegu samstarfi í kennslugreinum sínum, skv. markmiðum skóla- og aðalnámskrár,

• gerð kennsluáætlana og prófa í samstarfi við aðra kennara,

• að viðhalda faglegri hæfni sinni og huga að tengslum við aðrar námsgreinar,

• skráningu fjarvista nemenda sinna,

• öðru samstarfi vegna starfs síns skv. markmiðum skóla og aðalnámskrár,

• almennri upplýsingagjöf og upplýsingagjöf vegna sjálfsmats skóla og skóla­námskrár

• sitja kennarafundi sem boðaðir eru skv. reglurgerð um kennarafundi.

• önnur tilfallandi verkefni í samráði við skólameistara

Umsækjendur skulu hafa hæfni og rétt til að nota starfsheitið kennari og vera með sérhæfingu til að kenna bóknámsgreinar á 2.-4. hæfniþrepi samkvæmt aðalnámskrá framhaldsskóla, auk almennrar hæfni á viðkomandi fræðasviði sem krafist er við námslok á stigi 1.2 samkvæmt viðmiðum um æðri menntun og prófgráður eins og stendur í lögum nr. 95 frá 1. júli 2019.

Að auki þarf viðkomandi kennari að hafa

• reynslu af líffræði kennslu í framhaldsskóla

• góða þekkingu og reynslu af notkun upplýsingatækni í starfi

• getu til að sinna kennslu og samskiptum á íslensku

• sjálfstæð vinnubrögð

• mjög góða samskiptahæfni

• frjótt frumkvæði og jákvætt hugarfar

• vilja til þróunar í starfi og starfsháttum

• góða þekkingu á kennslukerfinu Canvas og námsumsjónarkerfinu Innu.

Laun samkvæmt gildandi kjarasamningi sem fjármála- og efnahagsráðherra og Kennarasamband Íslands hafa gert.

Í umsókn þurfa að koma fram upplýsingar um menntun (staðfesting á menntun), starfsréttindi sem kennari, fyrri störf og meðmælendur. Kynningabréf skal fylgja umsókn. Umsækjendur þurfa að hafa hreina sakaskrá.

Umsóknarfrestur rennur út 22. maí næstkomandi og verður öllum umsóknum svarað þegar ákvörðun hefur verið tekin um ráðningu.

Viðkomandi þyrfti að geta hafið störf við upphaf skóla í ágúst.