Atvinnurekendur eiga að skrá vinnutíma starfsfólks í hlutlægu, áreiðanlegu og aðgengilegu kerfi innan vinnustaðaðarins. Upplýsingarnar skulu vera aðgengilegar starfsfólki tólf mánuði aftur í tímann.  

Skráningarkerfið

Í skráningarkerfum vinnustaða þurfa að koma fram upplýsingar um: 

• daglegan og vikulegan vinnutíma 

• á hvaða tíma sólarhrings unnið er 

• samfelldan hvíldartíma 

• vikulegan frídag 

• tilvik þar sem vikið hefur verið frá reglum um hvíldartíma og vikulegan frídag  

• hvort starfsfólk hafi fengið hvíld síðar þegar vikið hefur verið frá reglum 

Vinnutími starfsfólks

Vinnuverndarlögin fjalla um skipulag vinnutíma en þar gildir meðal annars að starfsfólk eigi rétt á: 

• að minnsta kosti 11 klukkustunda hvíld á hverjum 24 klukkustunum, reiknað frá byrjun vinnudags. 

• hléi ef daglegur vinnutími er lengri en sex klukkustundir. 

• að minnsta kosti einum vikulegum frídegi sem tengist beint daglegum hvíldartíma. 

• að hámarksvinnutími á viku, að yfirvinnu meðtalinni, sé ekki umfram 48 klukkustundir að meðaltali á hverju fjögurra mánaða tímabili. 

Vinnutími barna og unglinga

Sérstakar reglur gilda um vinnutíma barna og unglinga  

Reynslan sýnir að of langur vinnutími og ónóg hvíld:

• eykur hættu á vinnuslysum og óhöppum

• eykur líka á að fólk missi einbeitingu við störf sín og tekur ekki eftir mikilvægum skilaboðum í vinnuumhverfinu

• leiðir til langvarandi þreytu og streitu meðal starfsfólks sem getur einnig haft neikvæð áhrif á samskipti milli fólks en vel er þekkt að aukinn pirringur og óþolinmæði í garð annarra er oft fylgifiskur mikillar streitu.  

Þess vegna skiptir máli að huga vel að skipulagi vinnutíma og þá ekki síst þegar ungt fólk á í hlut en því er hættara en eldra starfsfólki við að lenda í vinnuslysum og óhöppum enda oft reynsluminna.

Sjá nánar um vinnu barna og unglinga.