Flutt voru fjögur erindi helguð myndun, skráningu, afhendingu og varðveislu rafrænna gagna með áherslu á hvaða lærdómar hafa verið dregnir við úrlausn þessara verkefna. Tvö erindi voru flutt af sérfræðingum danska þjóðskjalasafnsins (Rigsarkivet) þar sem greint var frá reynslu, útfærslu og framtíðarsýn verkefnisins þar í landi. Umgjörð rafrænna skila á Íslandi til opinberra skjalasafna tekur mið af aðferðum sem danska þjóðskjalasafnið hefur mótað í áratugi og grundvallast á samkomulagi Þjóðskjalasafns við Rigsarkivet frá 2005.

Erindi fluttu Jette Holmstrøm Kjellberg og Bjørn Ehrenreich Riis Thorup frá danska þjóðskjalasafninu (Rigsarkivet). Jette lagði áherslu á mikilvægi gæðaeftirlits í skjalastjórn á myndunartíma gagna og fór yfir þær aðferðir sem best hafa reynst í Danmörku. Bjørn rakti í erindi sínu gildi aðferðafræðinnar við varðveislu rafrænna gagna sem Danir byggja á, kosti hennar og áskoranir, og veitti um leið innsýn í stöðu rafrænna skila í landinu og framtíðarhorfur.

Seinni hluti dagskrár var í höndum Heiðars Lind Hanssonar hjá Þjóðskjalasafni Íslands og Bergrúnar Lilju Sigurjónsdóttur hjá Vinnueftirlitinu. Erindi þeirra snertu bæði á mannauðsmálum og færni í rafrænni skjölun. Heiðar vakti athygli á nýrri mannauðsstefnu ríkisins þar sem meðal annars er stefnt að því að skilgreina lykilhæfni þvert á rikið. Þar væri eðlilegt að rafræn skjölun væri skilgreind sem lykilhæfni og myndi þá stuðla að góðum vinnubrögðum þvert á ríkið. Bergrún Lilja sagði reynslusögur af rafrænni skjölun og skjalastjórn hjá Vinnueftirlitinu og nefndi mikilvægi þess að skapa jákvæða og góða menningu í verkefninu. Þar taldi hún einnig skipta sköpum að stjórnendur gengu fram með góðu fordæmi og að hrósað væri fyrir það sem vel væri gert.

Fundarstjóri var Helga Margrét Höskuldsdóttir, sjónvarps- og íþróttafréttakona á RÚV.

Sjá nánari upplýsingar um frummælendur, heiti erinda og dagskrá hér.