Ígræði er samheiti yfir fjölbreyttan flokk lækningatækja sem grædd eru í mannslíkamann. Ígræði geta til dæmis verið gerviliðir, gervibrjóst, stoðnet í kransæðar eða kviðslit, naglar, skrúfur og plötur eftir beinbrot en einnig flóknari tæknibúnaður eins og hjartagangráðar, taugaörvi og lyfjadælur.

Ígræði er langoftast komið fyrir með skurðaðgerð, speglunartækni eða inngripi í æðakerfi. Húðin og vefirnir umhverfis ígræði þurfa að gróa eftir aðgerð og því getur fylgt bólga eða verkir. Húðsvæði eftir skurðaðgerð grær í flestum tilvikum á 2-3 vikum en nauðsynlegt er að viðhalda góðu hreinlæti á skurðsvæði eða á stungustað á meðan. Fylgjast þarf með blæðingum, hita og roða frá skurðsári. Þegar ígræði er komið fyrir í speglun eiga upplýsingar um skurðsár ekki við.

Ekki er mælt með sundferðum á meðan húðin er að gróa. Ígræði eru viðkvæm fyrir sýkingum og erfitt er að meðhöndla sýkingar sem koma upp þau Til að uppræta sýkingu getur komið til þess að fjarlægja þurfi ígræði.

Ígræði sem gefa frá sér vægan rafstraum eru til dæmis hjartagangráðar og bjargráðar (hjartagangráður með stuðvirkni). Mænuraförvar eru ígræði sem eru notuð við verkjameðferð eða hægða- og þvagleka.

Ígræði sem innihalda málma geta virkjað málmleitartæki við vopnaleit á flugvöllum. Í þeim tilvikum fylgja öryggisverðir alltaf sínum verklagsreglum, sem getur þýtt líkamsleit á farþegum. Hægt er að láta öryggisverði vita fyrirfram af ígræði og framvísa ígræðiskorti áður en farið er í gegnum öryggiseftirlit á flugvöllum.

Einstaklingar með ígræði mega í langflestum tilfellum fara í segulómun (MRI).

Allir sem fara í segulómun eru spurðir hvort þeir séu með ígræði og er mikilvægt að svara þeim spurningum rétt og að framvísa ígræðiskorti því til staðfestingar.

Upplýsingar um sérhvert ígræði má finna á ígræðiskorti, að auki eru þær geymdar í gagnagrunnum Landspítala og hjá embætti landlæknis.

Landspítali afhendir ígræðiskort rafrænt í Landspítala-app. Þar má finna upplýsingar um ígræðið sjálft, framleiðanda og aðrar upplýsingar sem krafist er samkvæmt lögum um lækningatæki nr. 132/2020.

Ígræði sem gefa frá sér rafstraum birtast einnig í Landspítala-appinu en að auki fær sjúklingur afhent ígræðiskort frá framleiðanda.