Sviðið hefur aðalumsjón með eftirliti með heilbrigðisstofnunum og heilbrigðisstarfsmönnum og gæðaþróun í heilbrigðisþjónustu. Eftirlitið tekur bæði til stofnana í opinberum rekstri og í einkarekstri. Hluti eftirlitsins er fólginn í úttektum innan stofnana sem og á starfsstöðvum heilbrigðisstarfsmanna. Sviðið hefur eftirlit með lyfjaávísunum og stuðlar að skynsamlegri lyfjanotkun landsmanna.

Sviðið tekur á móti ábendingum og kvörtunum sjúklinga vegna heilbrigðisþjónustu eða ábendingum er lúta að lögum um sjúkraskrár. Rannsókn alvarlegra óvæntra atvika heyrir undir sviðið. Þessum málum er fylgt eftir og séð til þess að viðeigandi úrbætur séu gerðar. Beiting eftirlitsúrræða landlæknis gagnvart heilbrigðisstarfsmönnum heyrir jafnframt undir sviðið, svo sem tilmæli, áminning, takmörkun eða svipting starfsleyfis.

Þá sinnir sviðið lögfræðilegum málefnum embættisins.

Sviðsstjóri er Jóhann M. Lenharðsson, netfang johann.m.lenhardsson(hja)landlaeknir.is

Heilbrigðisupplýsingasvið er miðstöð heilbrigðisupplýsinga á Íslandi. Sviðið ber ábyrgð á skipulagningu og rekstri skráa á landsvísu um heilsufar, sjúkdóma, slys, lyfjaávísanir, fæðingar, dánarmein og starfsemi og árangur heilbrigðisþjónustu í samræmi við 8. gr laga um landlækni og lýðheilsu nr. 41/2007. Tilgangur skránna er að afla þekkingar um heilsufar og heilbrigðisþjónustu, hafa eftirlit með þjónustunni, tryggja gæði hennar, meta árangur og nota þær við gerð áætlana um gæðaþróun í heilbrigðisþjónustu og til vísindarannsókna. Heilbrigðisupplýsingasvið ber einnig ábyrgð á framkvæmd reglubundinnar rannsóknar, Heilsa og líðan, sem er mikilvæg uppspretta upplýsinga um heilsu, líðan og lifnaðarhætti landsmanna.

Gagnasöfnun og gagnagreiningu embættisins er ætlað að uppfylla margs konar þarfir. Má þar nefna stuðning við stefnu og aðgerðir heilbrigðisyfirvalda, stuðning við heilsueflandi samfélög, nýtingu vegna eftirlitsskyldu embættisins og til almennrar vefbirtingar tölfræði um heilsufar og heilbrigðisþjónustu. Sviðið annast einnig umsóknir um aðgang að gögnum til vísindarannsókna.

Heilbrigðisupplýsingasvið er þátttakandi í fjölbreyttu fjölþjóðasamstarfi á sviði heilbrigðisupplýsinga og ber jafnframt ábyrgð á skilum gagna til alþjóðastofnana á borð við NOMESCO, WHO, OECD o.fl. Slíkt gerir Íslendingum kleift að bera heilsu, líðan og heilbrigðisþjónustu á Íslandi saman við önnur lönd.

Sviðsstjóri er Sigríður Haraldsd Elínardóttir, netfang sigridur.haraldsd.elinardottir(hja)landlaeknir.is

Markmið lýðheilsusviðs er að styðja samfélög, skóla og vinnustaði í að skapa aðstæður sem stuðla að heilsu og vellíðan fyrir alla. Áhersla er lögð á samvinnu við sveitarfélög, heilsugæslu, menntastofnanir og aðra hagsmunaaðila til að stuðla að árangursríku lýðheilsustarfi þvert á geira og svið samfélagsins m.a. í gegnum Heilsueflandi samfélag, Heilsueflandi leik-, grunn- og framhaldsskóla og Heilsueflandi vinnustaði.

Sviðið vinnur að heilsueflingar- og forvarnarstarfi þar sem unnið er heildstætt með helstu áhrifaþætti heilbrigðis. Unnið er að heilsueflingu m.a. með því að stuðla að hollu mataræði, aukinni hreyfingu, góðum svefni, geðrækt og tannvernd ásamt tóbaks-, áfengis- og vímuvörnum. Þá vinnur sviðið einnig að sjálfsvígsforvörnum og ofbeldis- og slysavörnum.

Lýðheilsusvið ásamt sviði heilbrigðisupplýsinga fylgist með stöðu og þróun valinna áhrifaþátta heilbrigðis m.a. með reglulegri vöktun og könnuninni Heilsa og líðan. Þá birta sviðin reglulega svæðisbundna lýðheilsuvísa sem byggja m.a. á þessum gögnum.

Sviðið vinnur einnig með stjórn Lýðheilsusjóðs að faglegri úthlutun styrkja.

Sviðsstjóri er Dóra Guðrún Guðmundsdóttir, netfang dora.g.gudmundsdottir(hja)landlaeknir.is

Sviðið ber ábyrgð á öllum innri rekstri embættisins, svo sem fjársýslu, mannauðsmálum, skjalavörslu, gæða- og öryggismálum, húsnæðismálum, þróun rafrænnar stjórnsýslu, móttöku og símavörslu ásamt útgáfu og miðlun efnis á vef og í öðru formi.

Sviðið ber ábyrgð á því að fjármál embættisins séu sýnd samkvæmt góðum bókhaldsvenjum og að raunhæf staða og útkomuspá fyrir rekstur embættisins liggi fyrir minnst ársfjórðungslega.

Sviðið ber ábyrgð á því að bregðast við framúrkeyrslu í rekstri og upplýsa framkvæmdastjórn þegar í stað.

Sviðið sér um veitingu starfsleyfa og sérfræðileyfa heilbrigðisstétta og veitir staðfestingu á rekstri heilbrigðisþjónustu. Afgreiðsla umsókna um undanþágu frá aldursákvæði laga um heilbrigðisstarfsmenn til að reka starfsstofu í heilbrigðisþjónustu heyrir jafnframt undir sviðið.

Sviðið er ráðgefandi gagnvart öðrum sviðum embættisins varðandi mannauðsmál og sér um að reglum ríkisins og samningum milli ríkis og stéttarfélaga sé fylgt.

Sviðið ber ábyrgð á húsnæðismálum embættisins og fylgist með því að aðgengi og öryggismál fylgi lögum og reglum og uppfylli kröfur sem gerðar eru til húsnæðis opinberra stofnana.

Sviðsstjóri er Þórgunnur Hjaltadóttir, netfang thorgunnur.hjaltadottir(hja)landlaeknir.is

Sóttvarnalæknir ber ábyrgð á sóttvörnum og heilbrigðisöryggi varðandi bráðar lýðheilsuógnir á Íslandi í samræmi við sóttvarnalög. Sóttvarnalæknir fer einnig með framkvæmd þeirra aðgerða sem tilgreindar eru í gildandi stefnu ríkisins í almannavarna- og öryggismálum.

Helstu verkefni:

• Vöktun og greining: Ber ábyrgð á vöktun mælivísa sem geta gefið til kynna ógnir við heilsu almennings af völdum smitsjúkdóma, eiturefna, geislavirkra efna, eða annarra óvæntra atburða sem geta haft alvarlegar heilsufarslegar afleiðingar.

• Ráðgjöf og viðbragð: Veitir stjórnvöldum, almenningi og heilbrigðisstarfsmönnum sérfræðiráðgjöf um sóttvarnir. Vinnur að gerð viðbragðsáætlana í samvinnu við almannavarnadeild ríkislögreglustjóra og gerir tillögur til ráðherra um ráðstafanir til að hefta útbreiðslu farsótta.

• Bólusetningar og sýklalyfjaónæmi: Skipuleggur og samræmir almennar bólusetningar í landinu. Sóttvarnalæknir vaktar jafnframt notkun sýklalyfja og sinnir aðgerðum gegn útbreiðslu sýklalyfjaónæmis.

• Alþjóðlegt samstarf: Annast samskipti við Alþjóðaheilbrigðismálastofnunina (WHO) vegna Alþjóðaheilbrigðisreglugerðarinnar, Sóttvarnastofnun Evrópu (ECDC) og Heilbrigðisöryggisnefnd Evrópusambandsins (HSC).

Sóttvarnalæknir og sviðsstjóri er Guðrún Aspelund, netfang: gudrun.aspelund(hja)landlaeknir.is

Persónuverndarfulltrúi veitir starfsmönnum ráðgjöf varðandi persónuverndarmál, svarar fyrirspurnum almennings og hefur eftirlit með því að embættið uppfylli skyldur sínar samkvæmt persónuverndarlögum.