Opinberir aðilar þurfa að bjóða út kaup á vörum, þjónustu og framkvæmdum þegar áætlað virði samnings fer yfir viðmiðunarfjárhæðir samkvæmt lögum um opinber innkaup.

Í útboði eru kaup auglýst opinberlega þannig að fyrirtæki geti skilað tilboðum á sömu forsendum. Í útboðsgögnum kemur meðal annars fram hvað á að kaupa, hvaða kröfur eru gerðar og hvernig tilboð verða metin.

Við mat á útboðsskyldu þarf fyrst að kanna hvort vara eða þjónusta falli undir miðlægan samning Fjársýslunnar. Ef samningur er til staðar ber að haga innkaupum í samræmi við ákvæði hans.

Ef enginn miðlægur samningur er til staðar þarf að meta áætlað virði innkaupanna og bera það saman við viðmiðunarfjárhæðir laga um opinber innkaup.

Við mat á áætluðu virði skal miða við heildarvirði samnings á samningstíma, þar á meðal mögulegar framlengingar og aðra valkosti sem tilgreindir eru í samningnum.

Ekki er heimilt að skipta innkaupunum upp í þeim tilgangi að komast hjá útboðsskyldu.

Ef innkaupum á sömu eða sambærilegri vöru, þjónustu eða framkvæmd er skipt upp í fleiri samninga skal miða við samanlagt virði þeirra.

Ef samanlagt virði innkaupanna er yfir viðmiðunarfjárhæðum ber að bjóða samninginn út í samræmi við lög um opinber innkaup.

Ferli við mat á útboðsskyldu