Hvað er gjaldþrot?

Gjaldþrot er fullnustugerð sem hefst þegar dómstóll hefur kveðið upp úrskurð um að bú einstaklings eða fyrirtækis (skuldara) sé tekið til gjaldþrotaskipa.   

Þegar skuldari er úrskurðaður gjaldþrota missir hann forræði á búi sínu og skipaður er skiptastjóri til að taka við búinu.  Skiptastjóri reynir að koma eignum búsins í verð og greiða niður skuldir þess. Þær skuldir sem fást ekki greiddar við gjaldþrotaskipti fyrnast á tveimur árum eftir að gjaldþrotaskiptum lýkur ef fyrningarfrestur er ekki rofinn.  

Nánar:

• Upplýsingar um gjaldþrot einstaklinga - Umboðsmaður skuldara

Hverjir geta krafist gjaldþrots?

Skuldari sjálfur eða kröfuhafar hans geta farið fram á gjaldþrotaskipti á búi hans. 

Kostnaður og skiptatrygging 

Sá sem leggur fram kröfu um gjaldþrotaskipti, hvort sem það er skuldari sjálfur eða kröfuhafi hans, þarf að greiða gjald í ríkissjóð þegar komið er með kröfu til héraðsdómstóls.

• Sjá gjaldskrá héraðsdómstólanna

Viðkomandi þarf einnig að leggja fram skiptatryggingu nema sýnt sé fram á að eignir skuldara muni nægja fyrir greiðslu skiptakostnaðar. Skiptatryggingu er ætlað að standa undir kostnaði við framkvæmd skiptanna, svo sem launum skiptastjóra.  

• Nánar um fjárhæð skiptatrygginga

Krafa um gjaldþrotaskipti verður ekki tekin fyrir fyrr en skiptatrygging hefur verið lögð fram.