Reglur um leigubíla

Akstur leigubifreiða er leyfisskyld starfsemi og um hana gilda lög um leigubifreiðaakstur nr. 120/2022 og reglugerð um leigubifreiðaakstur nr. 324/2023.

Vakin er athygli á að breyting á lögum um leigubifreiðaakstur nr. 120/2022 tekur gildi frá 1. júní 2026. Hægt er að lesa nánar um helstu breytingar á vef Samgöngustofu.

Eftirfarandi er umfjöllun um helstu skyldur sem hvíla á leyfishöfum samkvæmt ákvæðum þessara laga og reglugerðar.  

Auðkenning leigubíla

• Leigubílar skulu alltaf vera auðkenndir með skýrum hætti þannig að ekki sé vafi á að um leigubíl sé að ræða

• Leigubíl sem ekið er samkvæmt gjaldmæli skal vera auðkenndur með þakljósi

• Leigubíl sem er ekið samkvæmt fyrirframumsömdu heildarverði skal vera auðkenndur með leyfismiða útgefnum af Samgöngustofu í framrúðu bílsins

• Leigubíll skal vera auðkenndur með merki leigubílastöðvar neðarlega fyrir miðju í framrúðu. Auk þess skal stöðvarnúmerið vera sýnilegt á áberandi hátt ofarlega vinstra megin í afturrúðu leigubílsins.  

 Gjaldmælar eða fyrirframumsamið heildarverð

Löggiltir gjaldmælar skulu vera í öllum leigubílum sem seldir eru á leigu fyrir verð sem tekur mið af ekinni vegalengd eða þeim tíma sem ferðin tekur (ekki fyrirframumsamið verð).

Heimilt er að keyra án gjaldmælis þegar ferð er seld fyrir fyrirframumsamið áætlað eða endanlegt heildarverð. Rekstrarleyfishafi eða eftir atvikum atvinnuleyfishafi ber sönnunarbyrði um að komist hafi á samningur um heildarverð vegna ferðar áður en hún hófst.

 Sýnileiki verðskrár og leyfisskírteinis  

Þegar keyrt er samkvæmt gjaldmæli skal verðskrá alltaf vera áberandi og aðgengileg viðskiptavinum áður en farið er inn í leigubílinn.  Verðskrá skal einnig vera sýnileg inni í bílnum.

Þegar ferð er seld fyrir fyrirframumsamið heildarverð skal verðskrá og þær forsendur sem umsamið heildarverð byggist á vera aðgengilegar viðskiptavini þannig að það sé ljóst hvernig verðlagning er ákveðin.  Sem dæmi er þegar þjónusta leigubíls er pöntuð fyrirfram, til dæmis á vefsíðu eða í smáforriti, þá skal birta upplýsingar um verð með skýrum hætti áður en neytandi pantar þjónustuna.  

Leyfisskírteini rekstrarleyfishafa og atvinnuleyfishafa skal alltaf vera sýnilegt í leigubíl.  

Skyldur leigubílastöðva

Leigubílastöð skal tryggja skráningu gervihnattaupplýsinga í rafræna skrá leigubílastöðvar:

• Skrá allar ferðir rafrænt, þar á meðal upplýsingar um upphaf og lok ferðar, akstursleið og greiðslu

• Rafræn skrá skal einungis haldin í þeim tilgangi að tryggja öryggi og stuðla að neytendavernd

• Óheimilt er að vinna staðsetningarupplýsingar í öðrum ósamrýmanlegum tilgangi

• Staðsetningarupplýsingarnar skulu vera dulkóðaðar og varðveittar í 60 daga frá því að ferð var ekin

• Samgöngustofa getur kallað eftir gögnum úr rafrænni skrá í tengslum við reglubundið eftirlit eða eftir þörfum

• Rafræn skráningarkerfi stöðvanna skulu fara í árlega úttekt hjá óháðum aðila sem Samgöngustofa hefur samþykkt

Leigubílastöðvar þurfa einnig að bjóða upp á ferli fyrir kvartanir. Farþegar eiga að geta tilkynnt óeðlilega hátt verð eða slæma þjónustu. Leigubílastjórum er skylt að upplýsa farþega um þessi réttindi.

Aðbúnaður leigubíls 

Leigubíll skal uppfylla almennar kröfur sem gerðar eru til bíla samkvæmt umferðarlögum og reglugerðum.  

• Þriggja punkta öryggisbelti skal vera í öllum sætum leigubíls.  

• Leigubíll skal vera búinn slökkvitæki og sjúkrakassa. 

 Skráning leigubíls í ökutækjaskrá  

• Leigubíll skal vera skráður sem slíkur í ökutækjaskrá. 

• Rekstrarleyfishafi skal einn vera skráður eigandi eða umráðamaður leigubíls. 

Góðir viðskiptahættir  

Rekstrarleyfishafi ber ábyrgð á að rekstur leigubíls fari fram í samræmi við góða viðskiptahætti.