Reglur um leigubíla

Eftirfarandi er umfjöllun um helstu aðila sem fara með framkvæmd laga um leigubíla.  

Ráðherra  

Fer með yfirstjórn leigubílaaksturs samkvæmt lögunum.  

Samgöngustofa   

Fer með framkvæmd laganna og stjórnvaldsfyrirmæla sem eru sett samkvæmt þeim. Undir starfssvið stofnunarinnar fellur meðal annars útgáfa atvinnuleyfa og rekstrarleyfa, eftirlit með leyfishöfum og skipulagning námskeiða. Samgöngustofa sér jafnframt um að reka rafrænan gagnagrunn sem geymir upplýsingar um leyfishafa, bílnúmer leigubíla og fleira.

Neytendastofa  

Fer með eftirlit með verðupplýsingum leigubílaþjónustu.  

Lögregla  

Ef grunur vaknar um brot á lögunum getur lögreglan hafið rannsókn, annaðhvort að eigin frumkvæði eða eftir kæru frá Samgöngustofu.  

Lögreglu er heimilt hvenær sem er að stöðva bíla sem falla undir lögin og kanna hvernig flutning sé um að ræða og hvort hann sé í samræmi við ákvæði laganna.  

Leyfishöfum er skylt að verða við fyrirmælum lögreglu í tengslum við eftirlit hennar. Ef um leyfisskyldan flutning er að ræða sem fer fram án tilskilins leyfis er lögreglu heimilt að fyrirskipa kyrrsetningu bíls.