Innköllun jafnréttisáætlana frá leikskólum hófst í apríl 2019 og lauk um miðjan október. Innköllunin náði til 244 skóla og skiluðu 174 eða 71% fullgildum jafnréttisáætlunum eða gögnum til Jafnréttisstofu. Þetta eru heldur slakari heimtur en fyrir fjórum árum þegar um 80% skólanna skiluðu umbeðnum gögnum.

Landgræðslufélag Biskupstungna hefur um árabil staðið að uppgræðslu á svæði norðan Bláfellsháls þar sem kallaðar eru Moldir. Nú þykir svæðið vera orðið svo vel gróið að Moldir séu ekki lengur réttnefni. Síðsumars var svæði á Tunguheiði opnað aftur fyrir beit eftir áratuga uppgræðslustarf og forvitnilegt verður að fylgjast með áhrifum beitarinnar þar.

Persónuvernd hefur sent dómstólum landsins bréf og tilkynnt að stofnunin hafi fellt niður frumkvæðisathugun sína á framkvæmd dómstólanna við birtingu persónuupplýsinga í dómum á Netinu með vísan til dóms Evrópudómstólsins frá 24. mars 2022 í máli nr. C-245/20. Dómurinn varðar undanþágu frá valdsviði eftirlitsyfirvalda samkvæmt evrópsku persónuverndarreglugerðinni, sem vísar til þess þegar dómstólar fara með dómsvald sitt. Í niðurstöðu dómsins segir að vinnsla persónuupplýsinga framkvæmd af dómstólum í sambandi við upplýsingastefnu þeirra (e. in context of their communication policy) varðandi mál sem þeir hafa til meðferðar falli utan valdsviðs eftirlitsyfirvalda samkvæmt reglugerðinni.

Nýr eldaskáli í Vaglaskógi var formlega tekinn í notkun föstudaginn 26. júní og við sama tækifæri voru Rúnari Ísleifssyni þökkuð vel unnin störf í embætti skógarvarðar. Helga Ösp Jónsdóttir tók nýlega við keflinu og hún er fyrsta konan sem gegnir stöðu skógarvarðar í íslensku þjóðskógunum. Helga segist spennt fyrir því sem fram undan er, ekki einungis fyrir auknum möguleikum sem eldaskálinn færir heldur einnig nýju fræhúsi sem senn rís á Vöglum.