Sólveig Sanchez varði nýlega doktorsritgerð sína í náttúru- og umhverfisfræði við Landbúnaðarháskóla Íslands þar sem hún fjallaði um jarðveg birkiskóga með sérstöku tilliti til kolefnis- og vatnsbúskapar jarðvegsins. Niðurstöður hennar sýna að jarðvegur gamalla birkiskóga er kolefnisríkur, vel þroskaður eða þróaður og heldur vel vatni. Hann er með öðrum orðum mjög heilbrigður.

Undirritaður hefur verið samstarfssamningur milli Landbúnaðarháskóla Íslands, Lands og skógar, Náttúrufræðistofnunar, Fuglaverndar, Hafrannsóknastofnunar, Náttúruverndarstofnunar og bresku fuglaverndarsamtakanna Royal Society for the Protection of Birds um verkefnið Peatland Lifeline.is sem sagt var frá nýverið hér á landogskogur.is og snýr að endurheimt votlendis og líffræðilegrar fjölbreytni á Íslandi með stuðningi Evrópusambandsins. Í tengslum við undirritunina hittist hópur um fimmtíu fulltrúa þessara stofnana og samtaka á upphafsfundi verkefnisins á Hvanneyri.