Framlenging greiðslna vegna dvalar á stofnun

Framlengingu á greiðslum er ætlað að koma til móts við húsnæðiskostnað þegar fólk dvelur á hjúkrunarheimili eða sjúkrahúsi og greiðslur frá TR hafa fallið niður.

Almennar upplýsingar

Þú getur sótt um að framlengja greiðslum:

• að hámarki 3 mánuði í senn,

• að hámarki 6 mánuði í heild.

Hægt er að sækja um framlengingu 6 mánuði afturvirkt.

Skilyrði

Sækja þarf um innan 6 mánaða frá því að greiðslur féllu niður.

Innistæða í banka og upphæð verðbréfa og hlutabréfa má ekki vera hærri en:

• 4 milljónir hjá einstaklingi,

• 8 milljónir hjá hjónum og sambýlisfólki.

Maki fær ekki greidda heimilisuppbót fyrir sama tímabil og framlengingin nær til.

Fylgigögn

Með umsókn þurfa að fylgja afrit af gögnum sem staðfesta húsnæðiskostnað, til dæmis:

• afborganir húsnæðislána,

• reikningar vegna fasteignagjalda,

• greiðslur húsaleigu,

• reikningar vegna rafmagns-, hita- og vatnsgjalda,

• kostnaður vegna trygginga,

• kostnaður vegna húsnæðisviðgerða,

• annað sambærilegt.

Hvernig sæki ég um?

• Sótt er um á eyðublaði, fylla má það út í tölvu og skila í gegnum Mínar síður TR,

• kemur til okkar í þjónustumiðstöðina að Hlíðasmára 11 í Kópavogi

eða

• kíkir til umboðsmanna TR hjá sýslumönnum um land allt og fyllir út umsókn á pappír.

Mat á umsókn

Við mat á umsókn er litið til þess hvort framlenging sé nauðsynleg vegna afborgana eða annars rekstrarkostnaðar íbúðarhúsnæðis umsækjanda.

Eingöngu er hægt að sækja um vegna íbúðarhúsnæðis sem umsækjandi býr í.

Ef umsækjandi og/eða maki greiðir dvalarkostnað á hjúkrunarheimili er tekið tillit til þess kostnaðar en ekki þarf að skila inn staðfestingu á þeim kostnaði.

Framlenging greiðslna

Við mat á umsókn um framlengingu greiðslna er horft á heildarmyndina og allar aðstæður umsækjanda. Sérstaklega er skoðað hvort framlenging sé nauðsynleg til að standa undir afborgunum eða öðrum rekstrarkostnaði sem tengist íbúðarhúsnæði.

Framlenging greiðslna er aðeins heimil ef mánaðarleg greiðslubyrði er hærri en mánaðarlegar tekjur eftir skatt, þegar greiðslur frá TR hafa fallið niður. Einnig er hægt að veita framlengingu ef ráðstöfunartekjur eru lægri en sú fjárhæð sem talin er nauðsynleg til framfærslu, að teknu tilliti til útgjalda.