Atvinnuleysisbætur

• Skoðað er meðaltal launa 12 mánaða tímabils til þess að reikna út bótarétt.

• Hægt er að skoða allt að 36 mánuði aftur í tímann. Oftast eru síðustu 12 mánuðirnir frá umsókn notaðir til útreiknings bótahlutfalls.

• Ef umsækjandi er í fæðingarorlofi eða á sjúkradagpeningum er tímabilið þar á undan skoðað.

Dæmi um réttindi

• 100% starf í 12 mánuði veitir rétt til 100% greiðslna.

• 100% starf í 6 mánuði veitir rétt til 50% greiðslna.

• 75% starf í 8 mánuði veitir rétt til 67% greiðslna.

• 50% starf í 10 mánuði veitir rétt til 50% greiðslna.

Til að eiga lágmarksrétt, 25%, þarf að hafa unnið í 3 mánuði í að minnsta kosti 25% starfshlutfalli.

Tryggingagjald

Til að launafólk eigi rétt á atvinnuleysisbótum þarf atvinnurekandi að hafa greitt tryggingagjald vegna starfsins.

Breytilegt starfshlutfall

Það er miðað við meðaltal starfshlutfalls á því 12 mánaða tímabili sem skoðað er ef umsækjandi hefur ekki verið í sama starfshlutfalli. Réttur til bóta verður aldrei hærri en sem nemur starfshlutfalli á tímabilinu eða því starfshlutfalli sem umsækjandi vill ráða sig í.

Verktakavinna

Öll störf eru tekin með í útreikning á réttindum. Ef umsækjandi var líka sjálfstætt starfandi er tekið mið af þeim störfum líka.

Einstaklingur segir sjálfur upp

Umsækjandi sem hefur sagt upp vinnu án gildra ástæðna, eða verið valdur að eigin uppsögn, getur átt von á því að greiðslum verði frestað í upphafi bótatímabils. Ef skýringarbréf er ekki sent með umsókn er afgreiðslu hennar frestað.

Það er hægt að flýta fyrir afgreiðslu umsóknar með því að senda inn skýringu á starfslokum í gegnum Mínar síður. Smellt er á hnappinn „Skila gögnum“ og „Skýringarbréf“ valið sem tegund gagna. Í bréfinu þarf að koma fram hver ástæðan fyrir starfslokunum er.

Ef umsækjandi hefur leitað til stéttarfélags vegna starfslokanna, eða aðdraganda þeirra, þarf að senda staðfestingu frá stéttarfélaginu sem styður það að umsækjandi hafi leitað til félagsins. Hafa þarf samband við stéttarfélagið sitt til þess að fá staðfestinguna.

Sjómenn

Vinnuframlag sjómanna miðast við fjölda lögskráningardaga. Mánaðarvinna sjómanna telst vera 21,67 lögskráningardagar. Loka þarf fyrir lögskráningu áður en viðkomandi fær greiddar atvinnuleysisbætur.

Skilyrði:

• Launagreiðendaskrá hefur verið lokað. Skattinum þarf að hafa borist tilkynning um lok starfsemi.

• Tryggingagjald hefur verið greitt vegna starfsins.

• Mánaðarlegur staðgreiðsluskattur hefur verið greiddur af reiknuðu endurgjaldi.

Þetta á við um einstaklinga sem stunda atvinnustarfsemi á eigin kennitölu og þau sem starfa við atvinnurekstur með öðrum. Jafnframt á þetta við þegar umsækjandi er ráðandi aðili vegna eignarhlutar eða stjórnunar.

Tryggingagjald

Sjálfstætt starfandi einstaklingur á 100% rétt á atvinnnuleysisbótum ef viðkomandi hefur greitt tryggingagjald samfellt á síðustu tólf mánuðum áður en sótt er um.

Ef tryggingagjald hefur verið greitt skemur en 12 mánuði, en þó lengur en 3 mánuði, á síðustu tólf mánuðum áður en sótt er um, á viðkomandi rétt í samræmi við fjölda þeirra mánaða sem hann hefur greitt staðgreiðsluskatt.

Reiknað endurgjald

Umsækjandi getur átt 100% rétt á atvinnnuleysisbótum ef viðkomandi hefur greitt mánaðarlega staðgreiðsluskatt af reiknuðu endurgjaldi. Upphæð skatts verður að hafa verið að lágmarki samkvæmt viðmiðunarfjárhæð ríkisskattstjóra í viðkomandi starfsgrein.

• Ef greiddur skattur er lægri en viðmiðunarfjárhæðin, ákvarðast réttur viðkomandi af hlutfalli upphæðar reiknaðs endurgjalds sem greitt hefur verið af og viðmiðunarfjárhæðar.

• Ef greiddur skattur er lægri en 25% af viðmiðunarfjárhæð ríkisskattstjóra í viðkomandi starfsgrein á síðustu tólf mánuðum áður en sótt er um, er rétturinn til atvinnuleysisbóta enginn.

Tekjur gefnar upp einu sinni á ári

Einstaklingar sem gefa upp tekjur einu sinni á ári þurfa að skila með umsókn:

• Verktakayfirlýsingu

• Staðfestingu skattstjóra um skil á greiðslu tryggingagjalds og staðgreiðslu.

Þau sem búa utan höfuðborgarsvæðis leita til sýslumanns til að afla gagna.

Einstaklingar geta átt rétt á atvinnuleysisbótum þó þeir séu nýfluttir til Íslands. Skilyrði er að landið sem flutt er frá sé innan EES. Einstaklingur sem ætlar í atvinnuleit á Íslandi getur fengið vottað að hafa verið atvinnuleysistryggður í öðru EES-ríki með U1-vottorði. Þannig má auka rétt til atvinnuleysisbóta á Íslandi.

Nánar um U1-Vottorð

Ef einstaklingur sækir um atvinnuleysisbætur og hefur verið í fæðingarorlofi er annað 12 mánaða tímabil á síðustu 36 mánuðum skoðað, ekki það tímabil sem viðkomandi var í fæðingarorlofi.

Ef einstaklingur sækir um atvinnuleysisbætur og hefur verið í starfstengdri endurhæfingu er annað 12 mánaða tímabil á síðustu 36 mánuðum skoðað, ekki það tímabil sem viðkomandi var óvinnufær.

Einstaklingar sem bíða eftir endanlegu uppgjöri á launakröfum og eru atvinnulausir á uppsagnarfresti geta átt rétt á atvinnuleysisbótum.

• Einstaklingar verða að uppfylla almenn skilyrði um rétt til atvinnuleysisbóta.

• Framselja þarf þann hluta launakröfunnar sem nemur fjárhæð bótanna sem greiddar eru á þessum tíma. Krafan er framseld til Atvinnuleysistryggingasjóðs á hendur Ábyrgðasjóði launa.

• Umsókn um atvinnuleysisbætur felur jafnframt í sér umsókn um þátttöku í vinnumarkaðsaðgerðum.

Greitt er frá þeim degi sem uppsagnarfrestur tekur gildi. Að uppsagnarfresti liðnum getur viðkomandi fengið almennar atvinnuleysisbætur. Launþegi gjaldþrota félags getur fengið tekjutengdar atvinnuleysisbætur.

Ekki er hægt að sækja um atvinnuleysisbætur fyrr en félagið hefur verið úrskurðað gjaldþrota.