Einstaklingar í námi eiga yfirleitt ekki rétt á atvinnuleysisbótum. Það eru þó undantekningar á þessu, til dæmis ef nám er 12 einingar eða minna, einstaklingur missir vinnu eftir að önn hefst.
Skilyrði
Námsfólk þarf alltaf að skila inn skólavottorði.
Umsækjandi þarf að hafa áunnið sér rétt á atvinnuleysisbótum.
Einstaklingar sem eru í námi og fá atvinnuleysisbætur þurfa líka að sinna sömu skyldum og aðrir sem fá atvinnuleysisbætur greiddar.
1. Nám er 12 einingar eða minna
Einstaklingar sem stunda nám sem er hámark 12 einingar í framhaldsskóla eða háskóla geta átt rétt á atvinnuleysisbótum. Skilyrði er að námið sé ekki lánshæft hjá Menntasjóði námsmanna. Nám má stunda í dagskóla, kvöldskóla, eða í fjarkennslu.
Skila þarf inn staðfestingu á umfangi náms á Mínum síðum og sækja um námssamning.
2. Námsönn er hafin
Ef einstaklingur missir starf eftir að námsönn er hafin má ljúka þeirri önn. Skilyrði er að önnin hafi verið byrjuð þegar viðkomandi missti starfið. Það á bæði við um fullt starf eða hlutastarf en ráðningarhlutfall þarf að lágmarki að vera 25% af fullri vinnu.
Skila þarf inn staðfestingu á umfangi náms á Mínum síðum og sækja um námssamning.
3. Vottaðar námsleiðir hjá framhaldsfræðsluaðilum
Þú mátt stunda nám sem er í boði innan framhaldsfræðslunnar s.s. grunnmenntaskóla, menntastoðir og aðrar vottaðar námsleiðir án þess að það hafi áhrif á rétt til atvinnuleysisbóta.
Skila þarf inn staðfestingu á umfangi náms á Mínum síðum og sækja um námssamning.
Þegar umsækjandi hættir í námi og sækir um atvinnuleysisbætur skiptir máli hvernig námi var lokið. Ef námi er hætt án gildra ástæðna getur umdækjandi þurft að sæta biðtíma í í upphafi bótatímabils. Viðkomandi á ekki rétt á tekjugtengingu ef han sætir biðtíma.
Ef engar gildar ástæður eru fyrir námslokum flýtir fyrir afgreiðslu umsóknar að senda inn skýringarbréf. Ef slíkt bréf er ekki sent er afgreiðslu umsóknarinnar frestað.
Hægt er að flýta fyrir afgreiðslu umsóknar með því að senda inn skýringu á námslokum í gegnum Mínar síður með því að smella á hnappinn „Skila gögnum“ og velja Skýringarbréf sem tegund gagna.
Námssamningur
Það þarf alltaf að sækja um námssamning ef óskað er eftir greiðslu atvinnuleysisbóta meðfram námi.
Með umsókn skal fylgja skólavottorð frá skóla þar sem kemur fram einingafjöldi og fyrirkomulag náms (fjarnám, kvöldskóli,) sem umsækjandi er skráður í.
Umsókn um námssamning
Skyldur
Þau sem eru í námi og fá greiddar atvinnuleysisbætur hafa sömu skyldur og aðrir sem fá greiddar atvinnuleysisbætur:
Að vera í virkri atvinnuleit.
Að vera tilbúin að taka starfi sem býðst.
Að staðfesta atvinnuleit mánaðarlega á Mínum síðum Vinnumálastofnunar.
Að svara boðum um fundi, viðtöl og annað sem Vinnumálastofnun kann að senda.
