Að gerast fósturforeldri
Umsóknarferli
Þau sem hafa áhuga á því að gerast fósturforeldrar þurfa að sækja um leyfi og fara í gegnum mat á hæfni. Umsóknarferlið er unnið í samstarfi Gæða- og eftirlitsstofnunar velferðarmála, Barna- og fjölskyldustofu og viðkomandi barnaverndarþjónustu.
Umsóknarferlið
Umsækjandi sækir um leyfi til að taka barn í fóstur til Gæða- og eftirlitsstofnunar velferðarmála (GEV) og skilar fylgigögnum.
GEV sendir beiðni um umsögn til Barna- og fjölskyldustofu (BOFS).
BOFS óskar eftir frekari upplýsingum frá umsækjanda í þeim tilgangi að meta almennar kröfur sem gerðar eru til fósturforeldra
Umsækjandi horfir á rafræna fræðslu sem er ætluð til að undirbúa fósturforeldra fyrir hlutverk sitt
BOFS kallar eftir afstöðu barnaverndarþjónustu í heimilisumdæmi umsækjanda.
Ef ekkert er því til fyrirstöðu boðar Barna- og fjölskyldustofa umsækjanda í forviðtal, eftir að hann hefur horft á rafræna fræðslu, í þeim tilgangi að meta frekar hvort viðkomandi uppfylli almennar kröfur til fósturforeldra og hvort hlutverkið henti honum.
Sérfræðingur úr fósturteymi Barna- og fjölskyldustofu fylgir hverjum umsækjanda í gegnum allt ferlið og er honum innan handar varðandi ráðgjöf og fræðslu, meðal annars hvaða tegund af fóstri hentar umsækjanda.
Ef umsækjendur standast almennar kröfur fá þeir boð á staðnámskeið fyrir fósturforeldra hjá BOFS. Mat á hæfni fósturforeldra fer fram samhliða því námskeiði.
Þegar umsækjandi hefur lokið námskeiði er tekið annað viðtal ásamt úttekt á heimili.
Að loknu mati BOFS er umsögn um umsækjanda skilað til GEV.
GEV tekur ákvörðun um útgáfu leyfis og upplýsir umsækjanda um niðurstöðu leyfisveitingu.
Þeir umsækjendur sem fá útgefið leyfi fara á skrá yfir fósturforeldra sem BOFS heldur utan um.
Námskeið fyrir fósturforeldra
Rafræn fræðsla fyrir fósturforeldra er opin öllum sem hafa áhuga á að kynnast hlutverkinu frekar. Rafræna fósturforeldranámskeiðið þurfa allir umsækjendur um leyfi til að taka barn í fóstur að klára skv. umsóknarferli.
Allir umsækjendur þurfa að sækja staðnámskeið á vegum Barna- og fjölskyldustofu áður en leyfi er veitt. Námskeiðið er tveir dagar, kennt er fimmtudag og föstudag frá 9-16. Kennslan er í formi umræðna, hópvinnu, æfinga og heimaverkefna.
Samkvæmt ákvæðum barnaverndarlaga ber verðandi fósturforeldrum að sækja námskeið þar sem annars vegar er lagt mat á hæfni umsækjanda og hins vegar er veitt nauðsynleg þjálfun og undirbúningur fyrir hlutverk fósturforeldra.
Ef um hjón eða sambýlisfólk er að ræða er skilyrði að báðir sæki námskeiðið. Námskeiðið er þátttakendum að kostnaðarlausu en þátttakendur standa straum af ferðakostnaði og uppihaldi á meðan námskeið stendur yfir.
Sérfræðingur fósturteymis skráir umsækjendur á námskeið í samráði við þá. Að öllu jöfnu eru í boði fjögur námskeið á ári en umsækjandi sækir það námskeið sem er næst í röðinni þegar kemur að því í ferlinu að meta eigi hæfni hans.
Námskeiðið er byggt á Foster Pride, en hefur verið staðfært fyrir Ísland og í samræmi við það sem þekkist á Norðurlöndum.
Þjónustuaðili
Barna- og fjölskyldustofaTengd stofnun
Gæða- og eftirlitsstofnun velferðarmála