Skilyrði þess að nefndin geti tekið mál til meðferðar:

• Kvörtun berst frá neytanda. Með neytanda er átt við einstakling sem kaupir vöru eða þjónustu gegn endurgjaldi, enda séu kaupin ekki gerð í atvinnuskyni.

• Kvörtun beinist gegn seljanda. Með seljanda er átt við einstakling, félag, opinberan aðila og aðra sem koma fram í atvinnuskyni og gera samninga við neytendur.

• Neytandi hefur leitað til seljanda og reynt að ná sáttum í ágreiningi án árangurs.

• Ágreiningur á undir kærunefnd vöru- og þjónustu kaupa.

  • Frekari upplýsingar um hvenær mál eiga undir nefndina og frávísunarástæður er að finna hér.

  • Upplýsingar um aðrar úrskurðarnefndir í neytendamálum er að finna hér.

Allar upplýsingar um hvernig leggja eigi fram kvörtun má finna hér.

Eftirfarandi eru upplýsingar um þau atriði sem æskilegt er að komi fram í kvörtun:

• Upplýsingar um neytanda

  • Nafn, kennitala, heimilisfang, símanúmer og netfang

• Upplýsingar um seljanda

  • Nafn, kennitala, heimilisfang, símanúmer og netfang

  • Ef samskipti hafa farið fram milli neytanda og tiltekins starfsmanns seljanda með tölvupósti er gott að netfang þess starfsmanns komi fram í kvörtun.

• Upplýsingar um söluhlut/þjónustu

• Upplýsingar um samning milli aðila

• Fjárhæð kaupverðs eða greiðslu fyrir umrædda þjónustu

• Dagsetningar sem skipta máli

• Lýsing á ágreiningi í málinu

• Kröfur sem neytandi gerir á hendur seljanda og rökstuðningur, t.d. riftun, afsláttur, skaðabætur, úrbætur, afhending eða annað sem getur átt við.

Niðurstaða málsins byggir á þeim gögnum sem lögð eru fram.

Dæmi um gögn sem getur verið gagnlegt að láta fylgja með kvörtun:

• Staðfesting á greiðslu á vöru eða þjónustu

• Samningur milli aðila

• Reikningar

• Ljósmyndir

• Skilmálar

• Skrifleg samskipti milli aðila

• Skriflegt álit sérfræðings á galla

• Skriflegt álit sérfræðings á að verð fyrir þjónustu sé ósanngjarnt, ef það á við.

Ef fallist er á kröfu neytanda í heild eða að hluta fær hann málskotsgjaldið endurgreitt. Ef málsaðilar tilkynna nefndinni um sættir í máli eftir að kvörtun berst er málskotsgjaldið einnig endurgreitt neytanda.

Neytandi hefur rétt á að draga sig úr málsmeðferðinni á öllum stigum máls en málskotsgjald fæst þá ekki endurgreitt.

Kærunefndin vinnur að meginstefnu til mál í þeirri röð sem þau berast. Sökum fjölda mála hjá kærunefnd vöru- og þjónustukaupa má gera ráð fyrir að áætlaður málsmeðferðartími sé um 7-10 mánuðir.

Þegar úrskurður nefndarinnar liggur fyrir er hann birtur málsaðilum. Úrskurðir kærunefndarinnar eru birtir á heimasíðu nefndarinnar en persónulegar upplýsingar eru afmáðar.

Úrskurðum kærunefndarinnar verður ekki skotið til annarra stjórnvalda en aðilar geta borið ágreininginn undir dómstóla með hefðbundnum hætti. Málshöfðun frestar ekki réttaráhrifum úrskurðarins.

Seljanda er heimilt að tilkynna nefndinni að hann uni ekki úrskurðinum og er úrskurðurinn þá ekki bindandi. Slík tilkynning skal berast með skýrum og sannanlegum hætti innan 30 daga frá tilkynningu um úrskurðinn. Nefndin heldur skrá yfir seljendur sem fylgja ekki úrskurði nefndarinnar og er skráin aðgengileg almenningi á heimasíðunni.

Neytandi getur leitað fullnustu úrskurðarins á grundvelli laga um aðför nr. 90/1989 ef seljandi fer ekki að aðfararhæfum úrskurði. Að ósk neytanda gefur nefndin út vottorð um að skilyrði þess að krefjast fullnustu séu uppfyllt.