Kvörtun og fylgigögn eru send inn í gegnum vefgátt kærunefndar vöru- og þjónustukaupa.

Innskráning

• Einstaklingar með íslenska kennitölu skrá sig inn í gegnum island.is með rafrænum skilríkjum eða auðkennisappi.

• Einstaklingar sem ekki hafa íslenska kennitölu skrá sig inn með netfangi. Lykilorð (one-time password) er sent í tölvupósti sem er notað við innskráningu hverju sinni.

Kvörtun fyrir hönd annars

Hægt er að leggja fram kvörtun fyrir hönd annars einstaklings (neytanda). Skal þá haka við viðeigandi reit eftir innskráningu.

Kvörtunareyðublað

Eftir innskráningu fyllir neytandi út kvörtunareyðublað með upplýsingum um aðila málsins og þann ágreining sem uppi er. Kvörtunareyðublað má finna undir "Ný kvörtun". Leiðbeiningar um hvaða upplýsingar og gögn þurfa að fylgja kvörtuninni má finna hér að neðan.

Að lokinni útfyllingu kvörtunareyðublaðs flyst kvartandi yfir á greiðslusíðu þar sem greitt er málskotsgjald að fjárhæð 5.000 krónur.

Kvörtun telst móttekin hjá kærunefnd vöru- og þjónustukaupa þegar hún hefur verið send inn og málskotsgjald hefur verið greitt. Staðfesting á móttöku kvörtunar birtist á skjánum þegar greiðslan hefur verið samþykkt.

Eftirfarandi eru upplýsingar um þau atriði sem æskilegt er að komi fram í kvörtun:

• Upplýsingar um neytanda

  • Nafn, kennitala, heimilisfang, símanúmer og netfang

• Upplýsingar um seljanda

  • Nafn, kennitala, heimilisfang, símanúmer og netfang

  • Ef samskipti hafa farið fram milli neytanda og tiltekins starfsmanns seljanda með tölvupósti er gott að netfang þess starfsmanns komi fram í kvörtun.

• Upplýsingar um söluhlut/þjónustu

• Upplýsingar um samning milli aðila

• Fjárhæð kaupverðs eða greiðslu fyrir umrædda þjónustu

• Dagsetningar sem skipta máli

• Lýsing á ágreiningi í málinu

• Kröfur sem neytandi gerir á hendur seljanda og rökstuðningur, t.d. riftun, afsláttur, skaðabætur, úrbætur, afhending eða annað sem getur átt við.

Niðurstaða málsins byggir á þeim gögnum sem lögð eru fram.

Dæmi um gögn sem getur verið gagnlegt að láta fylgja með kvörtun:

• Staðfesting á greiðslu á vöru eða þjónustu

• Samningur milli aðila

• Reikningar

• Ljósmyndir

• Skilmálar

• Skrifleg samskipti milli aðila

• Skriflegt álit sérfræðings á galla

• Skriflegt álit sérfræðings á að verð fyrir þjónustu sé ósanngjarnt, ef það á við.

Ef fallist er á kröfu neytanda í heild eða að hluta fær hann málskotsgjaldið endurgreitt. Ef málsaðilar tilkynna nefndinni um sættir í máli eftir að kvörtun berst er málskotsgjaldið einnig endurgreitt neytanda.

Neytandi hefur rétt á að draga sig úr málsmeðferðinni á öllum stigum máls en málskotsgjald fæst þá ekki endurgreitt.